Tags-Wafa

gum-karda-e-idrāk meñ paivast jabīneñ
dar-chashm-e-yaqīñ bū-e-vafā tak nahīñ aatī

kyā batā.eñ pyaar kī baazī vafā kī raah meñ
kaun jiitā kaun haarā ye kahānī phir sahī

baiThī hai tohmatoñ meñ vafā yuuñ ghirī huī
jaise kisī hasīn kī gardan meñ baar ho

ahl-e-dil rahte haiñ tā-zīst vafā ke pāband
sham.a har rañg meñ jaltī hai sahar hone tak

bandish hai nigāhoñ pe dil-o-jāñ pe haiñ pahre
ta.abīr tirī ḳhvāb-e-vafā jāniye kyā ho

mahkā hai gul-e-ḳhūn-e-vafā jāniye kyā ho
jaltī hai koī sham-e-hinā jāniye kyā ho

us ko merāj-e-vafā kyuuñ na kahūñ jab akasr
bil-irāda vo mire naam tak aa pahuñche haiñ

kaam aa sakīñ na apnī vafā.eñ to kyā kareñ
us bevafā ko bhuul na jaa.eñ to kyā kareñ

maiñ thā vafā-sarisht mujhe thī vafā aziiz
vo thā bahāna-jū use ḳhū-e-bahā na thī

ārizoñ par vo tire tābish-e-paimān-e-vafā
chāñdnī raat ke chehre pe hayā ho jaise

ye dekhnā hai ki ba.ad tark-e-ta.alluqāt ai 'shakīl' kab tak
na koī ham par jafā karegā na ham kisī se vafā kareñge

ġham-e-daulat-e-vasl meñ ho ke hazīñ rah-e-ishq-o-vafā meñ haiñ ḳhāk-nashīñ
havas ab hameñ jāh-o-hasham kī nahīñ hameñ tere hī nashv-o-numā kī qasam

lab-e-gor agarche judā.ī meñ huuñ magar ā.ina-e-dil kī safā.ī meñ huuñ
tirā mahv ḳhudā kī ḳhudā.ī meñ huuñ mujhe apne hī ishq-o-vafā kī qasam

ḳhuuñ huā dil ki pashemān-e-sadāqat hai vafā
ḳhush huā jī ki chalo aaj tumhāre hue log

apnī bechārgī kī yuuñ to hai ehsās bahut
phir bhī dil tujh se vahī ahd-e-vafā māñge hai

vafā gumān hī Thahrī to kyā zarūr ki ab
lihāz-e-ham-safarī bhī safar meñ rakkhā jaa.e

vafā kī yādgāreñ tak na hoñgī
mirī jaañ bas koī din jā rahe haiñ

vo pāgal mast hai apnī vafā meñ
mirī āñkhoñ meñ aañsū aa rahe haiñ

bevafā kuchh nahīñ tirī taqsīr
mujh ko merī vafā hī raas nahīñ

ik umr mah-o-sāl kī Thokar meñ rahā huuñ
maiñ sañg sahī phir bhī sar-e-rāh-e-vafā huuñ