Tags-Wafa

merī āñkheñ shor thā jin kī vafā kā har taraf
zaḳhm dil meñ paḌte hī donoñ namak-dāñ ho ga.iiñ

ham sar-e-rāh-e-vafā us ko sadā kyā dete
jaane vaale ne palaT kar hameñ dekhā bhī na thā

jaan dete ho un ke va.adoñ par
jin kā va.ada vafā nahīñ hotā

ibtidā meñ jinheñ ham nañg-e-vafā samjhe the
hote hote vo gile husn-e-bayāñ tak pahuñche

nākāmī-e-vafā kā namūna hai zindagī
kūche meñ tere jo koī aayā ḳhajil gayā

mirā ishq bhī ḳhud-ġharaz ho chalā hai
tire husn ko bevafā kahte kahte

mohabbat tū mat kar dil us bevafā se
dil us bevafā se mohabbat tū mat kar

basān-e-naqsh-e-qadam tere dar se ahl-e-vafā
uThāte sar nahīñ hargiz tabāh ke maare

ye ahl-e-hashm ye dārā-o-jam sab naqsh bar-āb haiñ ai hamdam
miT jā.eñge sab parvarda-e-shab ai ahl-e-vafā rah jā.eñge ham

jal kar girā huuñ sūkhe shajar se uḌā nahīñ
maiñ ne vahī kiyā jo taqāzā vafā kā thā

mohabbatoñ meñ vafā kā hisāb degā kaun
añdherī shab ke liye āftāb degā kaun

vo ummīd kyā jis kī ho intihā
vo va.ada nahīñ jo vafā ho gayā

'ra.īs' ḳhū-e-vafā ne hameñ rulāyā hai
phir is chalan ko bhalā ham bhī aam kyā karte

vafā kā zikr nahīñ hai karam kī baat nahīñ
tire sulūk meñ phir bhī sitam kī baat nahīñ

ye kaafī hai ki ham dushman nahīñ haiñ
vafā-dārī kā da.avā kyuuñ kareñ ham

kaheñ kyā kyā kiyā hai ham ne kyā kyā
tujhe ai bevafā qadr-e-vafā kyā

tabīboñ kī saarī hai apnī kahānī
vafā bechte haiñ shifā bechte haiñ

ham ḳhaak ho ke bhī har mauj-e-havā se uljhe
ya.anī tirī vafā kā saudā gayā na sar se

khajūrī choTī adā meñ moTī jafā meñ lambī vafā meñ chhoTī
hai aisī khoTī ki dil har ik kā har ek laT meñ laTak rahā hai

jafā karne vāloñ ko kyā ho gayā hai
vafā kar ke bhī ham to sharmā rahe haiñ