Tags-Wafa

ham se mehr-o-vafā kī baat karo
hosh kī baat hoshyāroñ se

mai-kade se vafā kī manzil tak
ham faqīroñ ke here-phere haiñ

vafā kī saltanat iqlīm-e-vāda sar-zamīn-e-dil
nazar kī zad meñ hai ḳhvāboñ se tābīroñ ke kishvar tak

jazb-e-vafā nā-tamām zauq-e-vafā be-sabāt
lab pe mohabbat kā naam dekhiye kab tak rahe

ye adā-e-be-niyāzī tujhe bevafā mubārak
magar aisī be-ruḳhī kyā ki salām tak na pahuñche

auroñ pe karoge jab jafā.eñ
yaad aa.egī ye vafā mire ba.ad

umr shāyad na kare aaj vafā
kāTnā hai shab-e-tanhā.ī kā

jalā.e rakhnā diye pyaar ke maiñ ā.ūñgā
mujhe tumhārī vafā par baḌā bharosa hai

ik dushman-e-īmāñ se ho ummīd-e-vafā kyā
kab dasht meñ dīvār kā saayā nazar aayā

mohabbatoñ ke safīr ham haiñ judā hai tarz-e-safar hamārā
jahāñ bhī zikr-e-vafā milā hai vahāñ pe paiham Thahar ga.e haiñ

vafā karnā sitam sahnā nahīñ hai
mujhe ab aur kuchh kahnā nahīñ hai

tū munkir-e-vafā hai tujhe kyā dikhā.ūñ dil
ġham sho.ala-e-nihāñ hai bhalā kyā dikhā.ī de

sābit huā kisī pe na jurm-e-vafā kabhī
parda khulā na ishq-e-sarāpā-gunāh kā

kyā is hujūm-e-shauq se ghabrā na jā.egā
maanā vo bad-gumān-e-vafā mehrbāñ bhī hai

kuchh yaad haiñ āġhāz-e-mohabbat kī vo bāteñ
aur bhūlne vaale yahī paimān-e-vafā thā

tum jaur-o-jafā mujh pe na karte to burā thā
hote na agar zulm to kyā lutf-e-vafā thā

udhar vo ahd-o-paimān-e-vafā kī baat karte haiñ
idhar mashq-e-sitam bhī tark farmāyā nahīñ jaatā

anjām-e-vafā bhī dekh liyā ab kis liye sar ḳham hotā hai
nāzuk hai mizāj-e-husn bahut sajde se bhī barham hotā hai

log jo bā-vafā nahīñ hote
un kī auqāt kuchh nahīñ hotī

pāband-e-ehtiyāt-e-vafā bhī na ho sake
ham qaid-e-zabt-e-ġham se rihā bhī na ho sake