Tags-Wafa

ḳhirad bhī nā-mehrbāñ rahegī shu.ūr bhī sar-garāñ rahegā
in āñdhiyoñ meñ mirā junūn-e-vafā magar zau-fishāñ rahegā

maiñ huā bhī jo bismil-e-teġh-e-jafā vale baaqī hai dil meñ abhī ye vafā
ki yaqīñ hai lahū mirā jā-e-hinā jo lage to na pā-e-sanam se chhuTe

vafā ke shahr meñ ab log jhuuT bolte haiñ
tū aa rahā hai magar sach ko māntā hai to aa

tere har jaur pe yaañ shukr-e-ḳhudā hai ai dost
ki yahī maslak-e-arbāb-e-vafā hai ai dost

kyā ajab hai ki tirī ranjish-e-bejā ke sabab
tere 'shafqat' ko sar-e-tark-e-vafā hai ai dost

ham ko is ahd-e-vafā se thiiñ umīdeñ kitnī
tujh ko jo ahd-e-vafā bhuul chukā hai ai dost

merī vafā barā.e vafā ittifāq thī
mere sivā kisī pe ye afsūñ chalā nahīñ

lutf-e-suḳhan yahī thā ki ḳhud tum bhī kuchh kaho
ye vahm hai ki ab koī gosh-e-vafā nahīñ

rāh-e-vafā meñ aise maqāmāt bhī mile
apnā sar-e-niyāz bhī Thukrā ga.e haiñ ham

rah-e-vafā meñ nigāhoñ se ho ga.iiñ ojhal
jo sūrateñ mirī āñkhoñ kā intiḳhāb rahīñ

hazār koshish-e-paiham ke bāvajūd hameñ
tamām umr koī dost bā-vafā na milā

bevafā hai bā-vafā hai faisla hotā nahīñ
us se mil kar bhī haqīqat kā patā hotā nahīñ

jaan denā hai ain maqsad-e-ishq
un ko andāza-e-vafā kyā hai

dhuup ne jab aarzū ke jism ko nahlā diyā
ban ga.ī thiiñ tum vafā kā sā.ebāñ achchhī to ho

sitam ke ba.ad bhī baaqī karam kī aas to hai
vafā shi.ār nahīñ vo vafā shanās to hai

koī āshnā nahīñ hai aisā ki bā-vafā ho
kahte ho tum ye bāteñ ham ko sunā sunā kar

jo unheñ vafā kī sūjhī to na ziist ne vafā kī
abhī aa ke vo na baiThe ki ham uTh ga.e jahāñ se

mirī vafā ke safar kī takmīl ho to kaise
hai terā mehvar tirī adhūrī mohabbatoñ meñ

lagtī haiñ har galī meñ mohabbat kī boliyāñ
biktī yahāñ hai jins-e-vafā kū-ba-kū na pūchh

ahl-e-vafā kī karte haiñ kyā kyā ye ḳhātireñ
ḳhud mil ke un ko dekh kabhī mujh se tū na pūchh