Tags-Wafa

jafā-o-zulm us ke gilā karūñ kyūñ-kar
sitam-shi.ār hai vo aur vafā-shi.ār huuñ maiñ

hū kā aalam hai koī nāra-e-mastāna-e-haq
kyā tirī bazm-e-vafā meñ koī itnā bhī nahīñ

maut se jo vafā nahīñ karte
zindagī se shikast khāte haiñ

pās-e-ādāb-e-vafā thā ki shikasta-pā.ī
be-ḳhudī meñ bhī na ham had se guzarne paa.e

'nabīl' is liye maiñ āshiqī se baaz aayā
jise bhī pyaar karūñ bevafā nikal aa.e

jab ta.alluq na koī baaqī ho
kis tarah se vafā kare koī

kisī se pyaar kisī se vafā kisī se ḳhulūs
bigaḌ ga.ī haiñ hamārī bhī ādateñ kyā kyā

jafā se ġharaz imtihān-e-vafā hai
tū kah kab talak āzmātā rahegā

huī na un se vafā tum se kyā huā 'nāhīd'
abhī talak jiye jaatī ho bāvlī ban kar

vafā-shi.ār ko tū ne zalīl-o-ḳhvār kiyā
jafā-parast ye kyā sheva iḳhtiyār kiyā

sitam-shi.ār jafā-āshnā vafā-dushman
ye nañg-e-azmat-e-ādam hai aadmī kyā hai

nādim to haiñ vo qatl pe arbāb-e-vafā ke
lekin sar-e-fihrist haiñ kuchh naam abhī tak

harī bharī khetiyāñ kahāñ haiñ mire muqaddar ke zā.iche haiñ
shahīd-e-ishq-e-vafā kā 'tāhir' hatheliyoñ par hisāb likhnā

badle meñ jafāoñ ke vafā kyuuñ nahīñ dete
tum ishq ke sho.aloñ ko havā kyuuñ nahīñ dete

ik ik qadam pe dars-e-vafā de rahā huuñ maiñ
ye kis kī justujū hai kidhar jā rahā huuñ maiñ

dil ko āmāda-e-vafā rakhiye
āñdhiyāñ haiñ diyā jalā rakhiye

āsān nahīñ rāh-e-vafā dekh ke 'jāmī'
taklīf kahīñ bhuuk kahīñ pyaas kahīñ hai

yuuñ to milne ko ik zamāna milā
na milā haañ vo bevafā na milā

abhī husn o ishq meñ fāsle adam-e'timād ke haiñ vahī
unheñ aitabār-e-vafā nahīñ mujhe aitabār-e-jafā nahīñ

na vo harf-o-lafz kī dāvarī na vo zikr o fikr-e-qalandarī
jo mire lahū se likhī thī ye vo qarārdād-e-vafā nahīñ