Tags-Wafa

ik bevafā ke sāmne aañsū bahāte ham
itnā hamārī aañkh kā paanī marā na thā

sarāpā pyaar haiñ ham to vafā-parast bhī haiñ
ham aise shaḳhs ke dil meñ kudūrateñ kaisī

jab bhī hotā hai kahīñ tazkira-e-mehr-o-vafā
bhūle-bisre hue kuchh naqsh ubhar jaate haiñ

shab-e-visāl mire ham-nashīñ se farmāyā
yahī to haiñ jo hameñ bevafā samajhte haiñ

mujhe ye aap ke sar kī qasam na thā ma.alūm
ki aap bhī rah-o-rasm-e-vafā samajhte haiñ

āshiq na agar vafā karegā
phir aur kaho to kyā karegā

ahd-e-vafā yāroñ se nibhā.eñ nāz-e-harīfāñ hañs ke uThā.eñ
jab hameñ armāñ tum se sivā thā ab haiñ pashemāñ tum se ziyāda

tere har naqsh-e-qadam par jis ne sajda kar diyā
terī nazroñ meñ bhalā vo bevafā kyūñkar huā

nā sāhab ham se mat māñgo ahd-e-vafā in bātoñ par
jabr-o-sitam sahnā lekin koī tadbīr nahīñ karnā

vafā nahīñ to nahīñ mūrid-e-jafā hī sahī
hazār shukr ki maiñ dāḳhil-e-shumār rahā

jafā se bhī leñ maza na vafā kā kyūñkar
hameñ to har ik tarah hai nibāh karnā

hai zer-e-ġhaur apnī hī chāhat kā ehtisāb
terī vafā pe kyā maiñ abhī tabsira karūñ

ġham ko nashāt-e-zīst kā unvāñ banā diyā
us ne mirī vafā kā ajab sā sila diyā

log tujh ko bevafā kahte haiñ in se kyā gila
rañg-e-duniyā dekh kar ḳhāmosh ho jaate haiñ ham

sayyād kuchh to ḳhātir-e-ahal-e-vafā kare
ye kyā asīr-e-dām kiyā aur guzar gayā

ai dil-e-va.ada-talab phir koī tajvīz-e-vafā
ik nazar aur bhī tā.īd-e-nazar hone tak

jise karnā ho koī vāda-vafā
to vo phir lauT kar bhī aatā hai

kaho butoñ se ki ham tab.a saada rakhte haiñ
phir un se arz-e-vafā kā irāda rakhte haiñ

rāh-e-vafā meñ sāya-e-dīvār-o-dar bhī hai
lekin usī pe jaan se jaane kā Dar bhī hai

bāġh-e-vafā meñ ho nahīñ saktā ye faisla
sayyād yaañ pe kaun giraftār kaun hai