Tags-Wafa

na.e charāġh na.ī raushnī atā karte
agar purāne diye un se kuchh vafā karte

hameñ laakh zamāna lubhā.e to kyā na.e rañg jo charḳh dikhā.e to kyā
ye muhāl hai ahl-e-vafā ke liye ġham-e-millat o ulfat-e-dīñ na rahe

vo guloñ meñ guloñ kī sī bū na rahī vo azīzoñ meñ lutf kī ḳhū na rahī
vo hasīnoñ meñ rañg-e-vafā na rahā kaheñ aur kī kyā vo hamīñ na rahe

aap dene ko kyā nahīñ dete
bas vafā kā sila nahīñ dete

ham ko to raas hī aa.ī kisī kamsin kī vafā
haa.e vo log mohabbat meñ jo nākām rahe

ham to vābasta rahe tujh se ki hai ḳhū-e-vafā
tū ne kyā soch ke ai ġham hameñ chāhā hogā

markaz-e-husn-o-mohabbat matl.a-e-mehr-o-vafā
dil ke ā.īne meñ ik tasvīr honī chāhiye

zindagī kyā hai vafā kyā hai aqīdat kyā hai
ham batāte haiñ ḳhudāoñ kī haqīqat kyā hai

kisī bevafā kī ḳhātir ye junūñ 'farāz' kab tak
jo tumheñ bhulā chukā hai use tum bhī bhuul jaao

abas hai pesh-e-arbāb-e-suḳhan azm-e-suḳhan mujh ko
vafā kahne na degī qissa-e-rañj-o-mehan mujh ko

ab kahāñ jā ke ye samjhā.eñ ki kyā hotā hai
ek aañsū jo sar-e-chashm-e-vafā hotā hai

dil kī mehrāb meñ ik sham.a jalī thī sar-e-shām
sub.h-dam mātam-e-arbāb-e-vafā hotā hai

nahīñ hai jins-e-vafā kī tumheñ jo qadr na ho
baneñge kitne ḳharīdār dekhte jaao

hai kahāñ bū-e-vafā us dahan-e-shīrīñ meñ
ġhuncha-lab terī zabāñ ham ne bahut chūsī hai

vafā parchhā.īñ kī andhī parastish
mohabbat naam hai mahrūmiyoñ kā

svāñg bhartā phirūñ kab talak mohabbat ke
maiñ kyuuñ na saaf hī kah duuñ ki bevafā huuñ maiñ

takmīl-e-vafā hosh meñ mumkin hī nahīñ thā
dīvāna samajh buujh ke dīvāna banā hai

vafā-parast nahīñ thā to aur kyā thā vo
jo zaḳhm zaḳhm huā aa.ine banātā huā

ik vo bhī haiñ marte haiñ jo nañg-e-vafā ban kar
har vaar pe ham ne to qātil ko duā dī hai

lafzoñ ko tark kar de ki in ko nahīñ sabāt
āñkhoñ meñ aaj apnī vafā ko sameT le