Tags-Wafa

mirī vafā meñ hai kyā tazalzul mirī itā.at meñ kyā kamī hai
ye kyuuñ nigāheñ phirī haiñ mujh se mizāj meñ kyuuñ ye barhamī hai

kyā be-muravvatī kā shikva gila kisī se
ḳhud ham ne kab vafā kī apne sivā kisī se

aa jā ki tere ahd-e-vafā kā bharam rahe
rah jaa.e aabrū bhī mire e'tibār kī

pahāḌoñ se bhī jo uThā.e na uTThā
vo bār-e-vafā ham uThā.e hue haiñ

na jaane kis qadar masrūf hogā
tirā vāda-vafā hone se pahle

ḳhudāvandā tere ma.asūm bande
vafā kī phir himāqat kar rahe haiñ

merī ayyār nigāhoñ se vafā māñgtā hai
vo bhī mohtāj milā vo bhī savālī niklā

hamāre haq meñ duā karegā
vo ik na ik din vafā karegā

vafā kī fasl phir bone chalī huuñ
maiñ kyā pā.ūñgī bas khone chalī huuñ

baqā sadaf kī guhar ke sivā kuchh aur nahīñ
vafā shu.ūr-e-bashar ke sivā kuchh aur nahīñ

saath jo de na sakā rāh-e-vafā meñ apnā
be-irāda bhī use yaad kiyā hai barsoñ

daañv par hai vafā kināroñ kī
mauj kā lauTnā zarūrī hai

haiñ jahāñ meñ kahīñ vafā vaale
jī haañ ālī-janāb haiñ ham log

un ke aage ghanToñ kī arz-e-vafā aur kyā paayā
ek tabassum mub.ham sā iqrār aur inkār ke biich

dil ke kahne pe lagā lī hai vafā kī tohmat
varna jiinā to mujhe bā.is-e-āzār na thā

aur bhī log the taufīq-e-vafā rakhte the
ek maiñ hī to tire ġham kā sazā-vār na thā

maslahat-kesh bane baiThe haiñ sab ahl-e-vafā
itnā rusvā to kabhī ishq kā pindār na thā

bahut hī sastī hai bāzār-e-jāñ meñ jins-e-vafā
are ye qaht-talab dil kā kārḳhāna gayā

maiñ vo shahīd-e-vafā huuñ ki qatl kar ke mujhe
mirā ġhanīm ta.assuf se haath maltā hai

ta.ajjub hai vafā ke baab meñ bhī had muqarrar hai
vo sab samtoñ meñ jaise kāñch kī dīvār rakhtā hai