Tags-Wafa

dil kā har zaḳhm mirā dād-e-vafā māñge hai
be-gunāhī mirī ab tum se sazā māñge hai

ye vafā māñge hai tum se na jafā māñge hai
merī māsūm jabīñ ek ḳhudā māñge hai

jo apne va.ade vafā vo kare karam us kā
ki ham se to na vafā vāda-e-alast hue

kaise rakheñge sar pe kisī kā udhār ham
qarz-e-vafā meñ karte haiñ sar kā shumār ham

maiñ zamāne meñ tirā ġham huuñ ba-unvān-e-vafā
zindagī merī sahī hai tirī rusvā.ī bhī

husn par hai ḳhūb-rūyāñ meñ vafā kī ḳhū nahīñ
phuul haiñ ye sab pa in phūloñ meñ hargiz bū nahīñ

saada purkār haiñ ḳhūbāñ 'ġhālib'
ham se paimān-e-vafā bāñdhte haiñ

mire dil ke hāthoñ se bahr-e-vafā meñ mirī zindagī meñ na ho jaa.e gaḌbaḌ
kabhī kasrat-e-rañj-o-ġham kā thapeḌā kabhī josh-e-ummīd-o-hasrat kī ojhaḌ

hamesha tamannā-o-hasrat kā jhagḌā hamesha vafā-o-mohabbat kā hullaḌ
thame kyā tabī.at ruke kis tarah dil ye aafat vo fitna ye āñdhī vo jhakkaḌ

jo nāvak chale aur talvār niklī to qaa.em rahā maiñ hī ahd-e-vafā par
kisī ne kisī ko bhī phir kar na dekhā paḌī imtihāñ-ghar meñ kuchh aisī bhāgaḌ

sunā hai vo bhī mire qatl meñ mulavvis hai
vo bevafā hai magar itnā bevafā bhī nahīñ

apnā shāyad yahī thā jurm ai dost
bā-vafā ban ke be-vafā na bane

jab bhī dasht-e-vafā meñ raqs-e-ābla-pā yaañ hovegā
ahl-e-vafā us se pahle hī raah meñ kāñTe bo leñge

sharminda-e-butāñ na hue laakh laakh shukr
'sālik' ḳhudā ne ham ko uThāyā vafā ke saath

yuuñ kahte haiñ ki tujh ko satā.e hī jā.eñge
goyā ki mujh ko ishq hai apnī vafā ke saath

jo muhibbā-e-vafā haiñ vo vafā karte haiñ
kuchh ġharaz is se nahīñ koī jafā karte haiñ

jaane kyā baat hai ab rāh-e-vafā meñ akasr
zindagī apne hī saa.e se ThiThuk jaatī hai

umiid un se vafā kī to ḳhair kyā kiije
jafā bhī karte nahīñ vo kabhī jafā kī tarah

is meñ hamārī apnī ḳhudī kā savāl thā
ehsāñ nahīñ kiyā hai jo vaada vafā kiyā

ham ne kisī ko ahd-e-vafā se rihā kiyā
apnī ragoñ se jaise lahū ko judā kiyā