Tags-Wafa

koī bhūlā huā naġhma huuñ dil kā
vafā ke āñsuoñ meñ Dhal rahā huuñ

dāstān-e-dard-e-dil ahl-e-vafā kahne lage
ya.anī har āvāz ko terī sadā kahne lage

bā-vafā koī koī hotā hai
maiñ bhī thā koī koī hotā hai

kashtī vafā kī Duubī to bahr-e-yaqīn meñ
maujeñ ga.ī haiñ saath kināra nahīñ gayā

kaun kahtā huā zindān-e-badan se niklā
qaid meñ rakh ke bhī ham se ye vafā chāhte haiñ

tū bevafā hī sahī tujh se pyaar aaj bhī hai
tire liye ye dil-o-jāñ nisār aaj bhī hai

tumhārī yaad ke dīpak bhī ab jalānā kyā
judā hue haiñ to ahd-e-vafā nibhānā kyā

'ishrat' ḳhulūs-o-mehr-o-vafā dostī kī laaj
biktī haiñ saarī chīzeñ yahāñ ek bhaav par

saath jo de na sakā rāh-e-vafā meñ apnā
be-irāda bhī use yaad kiyā hai barsoñ

ab kahāñ ahd-e-vafā kī pāsdārī ab kahāñ
jo haqā.eq the vo afsānoñ meñ Dhal kar rah ga.e

jin ne ujāḌī dil kī khetī un kī zamīneñ ḳhatm huiiñ
ham to ra.iis the shahr-e-vafā ke apnī riyāsat kam na huī

kī fikr magar baa.is na khulā ai lāla-ruḳh-e-be-mehr-o-vafā
batlā to ye dil kā dard hai kyā gar dāġh-e-jigar hai partav-e-ruḳh

vafā na kartā agar ik hasīñ to baat bhī thī
'asad' ko saare ke saare fareb dete rahe

ujaḌ chukīñ haiñ bastiyāñ baseñgī, kis tarah bhalā
vafā ke dar se bas hameñ koī to ab davā mile

jo thak ga.e haiñ dar-ba-dar vafā tirī talāsh meñ
zamīñ kī god meñ unheñ koī to ab jagah mile

jaao bhī kyā karoge mehr-o-vafā
bār-hā aazmā ke dekh liyā

kitnī farhat-fazā thī bū-e-vafā
us ne dil ko jalā ke dekh liyā

rāh-e-vafā meñ phuul nahīñ haiñ ḳhaar bahut haiñ 'hastī' jī
pyaar kā dushman saarā zamāna pahle bhī thā aaj bhī hai

ham ne bhī ik zamāna dekhā hai
itnā qaht-e-vafā na thā pahle

bevafā kah ke tujhe apnā bharam kyuuñ kholeñ
ai subuk-gām hamīñ rah ga.e tujh se pīchhe