Tags-Wafa

bevafā saare parinde ho ga.e
dostī apnī bhī thī ik mor se

kahte haiñ āshiqāñ yū mirā haal dekh kar
shāyad tuuñ dil diyā hai kisī bevafā ke haath

payambaroñ se zamīneñ vafā nahīñ kartīñ
ham aise kaun ḳhudā the ki apne ghar rahte

chhoḌ ham ne diyā vafā karnā
dekheñ is samt kyā hisāb aa.e

havā kuchh aisī chalī hai 'faizī' tamīz apnoñ kī ab hai mushkil
mirī tamannā bhī kuchh ḳhafā hai vafā bhī dāman chhuḌā rahī hai

raa.ij raheñge shahr-e-suḳhan meñ hamāre sher
sikke haiñ ye khare ki ye qisse vafā ke haiñ

vafādārī huī be-kār marnā khel aa Thahrā
ḳhudā jaane ki ab kyā rañg-e-ā.īn-e-vafā Thahre

rah-e-ishq-o-vafā meñ zindagānī
tarāna bhī hai soz-o-sāz bhī hai

use kaise na dil de duuñ ki jis meñ
vafā bhī husn bhī andāz bhī hai

rah-e-vafā meñ tirī bevafā.ī kī had tak
maiñ dhuup dhuup huī sā.ebāñ banāte hue

junūñ ke dasht meñ nikleñ vafā kī had kar deñ
uThā ke eḌiyāñ apnī darāz qad kar deñ

shab-e-firāq ke dariyā meñ kuud kar 'rāsiḳh'
tamām qarz vafā ke koī utaar gayā

mehr-o-vafā kā naam hai ab baat baat par
ye sun liyā hai aap ne kis kī zabān se

guzrī hai āzmā.ish-e-mahr-o-vafā meñ umr
fursat mujhe milī na kabhī imtihān se

maiñ vafā-kesh 'ārzū' aur vo vafā-nā-āshnā
paḌ gayā mushkil meñ pā kar apnī mushkil kā patā

vafā ḳhulūs daġhā jhuuT sab maiñ dekhūñ to
tū mere sāmne har chiiz baarī baarī rakh

jitne bhī mile rañg vo sab bhar diye tujh meñ
ik rañg-e-vafā aur hai lā.ūñ vo kidhar se

merī sūrat se bhī chiḌh ho ga.ī paidā jin ko
ḳhuuñ rulā.egī unheñ merī vafā mere ba.ad

vo bahāne lage āñkhoñ se lahū ke aañsū
rañg le aa.ī hai ye merī vafā mere ba.ad

sitam karnā daġhā karnā ki va.ade kā vafā karnā
batāo kyā tumheñ aayā hai kyā ab tak nahīñ aayā