Tags-Wafa

kis jafā-kār se ham ahd-e-vafā kar baiThe
āḳhir is baat ne ik roz pashemān kiyā

ye tere lams kā jaadū hai yā vafā merī
badan se aa gayā bāhar gale lagātā huā

har shāḳh pe thī vafā kī qindīl
ai shahr batā kahāñ vo ban hai

bas ek baar hī toḌā jahāñ ne ahd-e-vafā
kisī se ham ne phir ahd-e-vafā kiyā hī nahīñ

majāl kyā ki na manzil bane nishān-e-vafā
safīr-e-ḳhud-nigrāñ gard-e-rāh hoñ to sahī

aahoñ kī tāmīreñ kī thiiñ sabr ke baaġh lagā.e the
shahr-e-vafā meñ mehnat-e-jāñ kī roz na.ī mazdūrī thī

qissa chheḌā mehr o vafā kā avval-e-shab un ā.ankhoñ ne
raat kaTī aur umr guzārī phir bhī baat adhūrī thī

vafā kā imtihāñ hai jān-o-tan kī āzmā.ish hai
ḳhudā rakkhe ḳhudī ke bāñkpan kī āzmā.ish hai

utar chukā hai rag-o-pai meñ zahr-e-ġham phir bhī
ba-pās-ahd-e-vafā chashm nam nahīñ karte

jafā se unhoñ ne diyā dil pe daaġh
mukammal vafā kī sanad ho ga.ī

rah-e-vafā meñ fanā huā par kisī ke aage jhukā nahīñ jo
vafāoñ kā maiñ vo qāfila huuñ mujhe duāoñ meñ yaad rakhnā

jo haiñ dast-e-gustāḳh apne salāmat
to jhūTā hī va.ada vafā hai kisī kā

hasīñ hashr meñ sar jhukā.e hue haiñ
vafā aaj va.ada huā hai kisī kā

ek to mushkil vafā ke marhale
aur phir dushman jahāñ hai āj-kal

jaane kyā qīmat-e-arbāb-e-vafā Thahregī
maiñ agar arz karūñgā to ḳhatā Thahregī

zikr-e-vafā-o-ulfat mat chheḌ bas 'hasan' ab
jī ho rahā hai apnā bezār sab taraf se

vaqt ne ham ko agar patthar banā Daalā hai to ham kyā kareñ
yaad haiñ vo din bhī ham ko ham bhī jab mehr o vafā kā baab the

aaj bhī mehr-o-vafā kī nahīñ qīmat koī
aaj bhī manzilat-e-kīsa-e-zar hai ki jo thī

manzil-e-be-jahat kī ḳhair sa.ī-e-safar hai rā.egāñ
ahl-e-vafā ke qāfile phir bhī to haiñ ravāñ davāñ

pachās sāloñ meñ do ik baras kā rishta thā
mirī vafā se tumhārī havas kā rishta thā