Tags-Wahshat

aur kyā dekheñ ki vahshat ke sabab
phuul dekhe haath meñ patthar liye

thā mirā hañgāma-e-vahshat azal se peshtar
arsh kī zanjīr TukḌā hai mirī zanjīr kā

dīvānoñ ko ab vus.at-e-sahrā nahīñ darkār
vahshat ke liye sāya-e-dīvār bahut hai

kabhī jo dil ne kahā ab chalo yahāñ se chaleñ
to uTh ke ālam-e-vahshat meñ jā ke baiThe haiñ

tanhā.ī milī mujh ko zarūrat se ziyāda
paḌhtī haiñ kitābeñ mujhe vahshat se ziyāda

sabā merī qadam-bosī se pahle gul na dekhegī
agar vahshat ne kuchh din baaġh meñ rahne diyā mujh ko

josh-e-vahshat tujh pe sadqe apnī jaan
kaun talve is tarah sahlā.egā

Dūbtī nabz kahīñ kā nahīñ chhoḌegī mujhe
dard le Dūbegā vahshat mujhe le Dūbegī

sunā rahe ho yuuñ vahshat meñ hāl-e-ġham jo 'azm'
huā vo nāla-e-dil dard kā bayāñ na huā

ham ne vahshat-kada-e-bazm-e-jahāñ meñ juuñ sham.a
sho.ala-e-ishq ko apnā sar-o-sāmāñ samjhā

ik hasīñ ḳhvāb ki āñkhoñ se nikaltā hī nahīñ
ek vahshat hai ki ta.abīr huī jaatī hai

dekh kar chashm-e-siyāh-e-māh-rū vahshat huī
chāñdnī meñ us hiran kā rañg kaalā ho gayā

mere har lafz kī vahshat meñ hai ik umr kā ishq
ye koī khel-tamāshā nahīñ likkhā maiñ ne

ab zabt se kah de ki ye ruḳhsat kī ghaḌī hai
ai vahshat-e-ġham der se kyā soch rahī hai

ḳhvāboñ se udhar kī masāfat meñ jo guzrī hai kyā pūchhte ho
ik vahshat chār-pahar kī thī ik jaltī huī tanhā.ī thī

āshob hai aisā ki sarāsīma hai vahshat
ye ijz-e-bayāñ zaḳhm bhī dhone nahīñ detā

kuchh bahāroñ hī pe nahīñ mauqūf
merī vahshat ko bhī sabāt nahīñ

kisht-e-vahshat ho jise dekhnī aa.e dekhe
har bagūla ḳhas-o-ḳhāshāk se bāñdhā gayā hai

kitnī vahshat hai darmiyān-e-hujūm
jis ko dekho gayā huā hai kahīñ

koī vahshat se bhī milvā.e mujh ko
maiñ sahrā meñ abhī bilkul nayā huuñ