Tags-Wahshat

un kī shoḳhī bhī huī hai mirī vahshat kā javāb
haath Daalā jo garebāñ meñ garebāñ na rahā

miT gayā shaġhl-e-junūñ ab vo kahāñ jāma-darī
zor vahshat kā bhī ab dast-o-garebāñ na rahā

samjhe the dasht-e-junūñ meñ kuchh bahal jā.egā dil
dekh kar sunsān jañgal duunī vahshat ho ga.ī

dī hai vahshat to ye vahshat hī musalsal ho jaa.e
raqs karte hue atrāf meñ jañgal ho jaa.e

zikr-e-vahshat meñ agar TuuT girī hai 'fā.ez'
chhoḌ tasbīh ke dānoñ ko pironā kyā hai

rāteñ us ke hijr meñ ab bhī naza.a ke aalam meñ kaTtī haiñ
dil meñ vaisī hī vahshat hai tan meñ jaan abhī baaqī hai

rahe vahshat-zada ke saath to vahshat milī har dam
vo hī vahshat rahī man meñ sabhī mausam suhānoñ meñ

zanjīr jo khaḌkhaḌā rahī hai
vahshat kyā ġhul machā rahī hai

is qadar vahshat bhī ai dast-e-junūñ kis kaam kī
tere hāthoñ merā jiinā bhī to dūbhar ho gayā

josh-e-vahshat kā irāda thā ki uryāñ hī rahe
baare mar kar ik kafan mujh ko mayassar ho gayā

ishq un shahrī ġhazāloñ kā junūñ ko ab khiñchā
vahshat-e-dil baḌh ga.ī ārām-e-jāñ ram ho gayā

nek o bad kuchh nazar aatā nahīñ vo vahshat hai
parda ġhaflat kā mire pesh-e-nazar chhoḌ diyā

ḳhāna-e-dil to mohabbat meñ rahā bāġh-o-bahār
aur ghar hoñge jinheñ vahshat-sarā paate haiñ log

apnī vahshat kā ġhubār uThte hue dekhtā huuñ
maiñ bhī huuñ apne hī āhū-e-gurezāñ meñ kahīñ

dil kī ḳhvāhish hai yahī 'jyotī' ki vahshat ho agar
is nazāre kā faqat maiñ hī nazāra dekhūñ

pata us kī nigāh-e-vahshat-afzā kā lagānā hai
nigāheñ vahshiyoñ kī dekhtā phirtā huuñ zindāñ meñ

chāhe haiñ tamāshā mire andar ka.ī mausam
laao koī sahrā mirī vahshat ke barābar

dasht-e-vahshat meñ ġhubār-e-nāqa-e-lailā to hai
hasrat ai pā-e-junūñ zanjīr raushan ho ga.ī

chaak kar Dālūñgā dāmān-e-kafan vahshat se
āstīñ se na mirā haath jo bāhar hogā