Tags-Wahshat

jañgal ke biich vahshat ghar meñ jafā o kulfat
ai dil batā ki tere maare ham ab kidhar jaañ

taal detī hai jab kabhī vahshat
raqs kartā huuñ maiñ ḳhayāl ke biich

ishq meñ manzil ārām bhī thī
ham sar-e-kūcha-e-vahshat Thahre

dil ne imdād kabhī hasb-e-zarūrat nahīñ dī
dasht meñ aql na dī shahr meñ vahshat nahīñ dī

jin ḳhaak ke zarroñ par vo sāya-e-mahmil thā
jo ḳhaak kā zarra thā vahshat-kada-e-dil thā

safar se kis ko mafar hai lekin ye kyā ki bas reg-zār aa.eñ
kahīñ koī sā.ebān bhī de ki gard-e-vahshat utaar aa.eñ

be-talab kar ke zarūrat bhī chalī jaa.e agar
Dar rahī huuñ ki ye vahshat bhī chalī jaa.e agar

na pūchho naam mujh vahshat-zada kā dasht-e-furqat meñ
siḌī saudā.ī majnūñ mast be-ḳhud zar-o-dīvāna

donoñ zulfoñ kā tirī aayā jo vahshat meñ ḳhayāl
paḌ ga.iiñ paañv meñ mere vahīñ zanjīreñ do

tujh pe guzre na ālam-e-vahshat
tū na dekhe ye bebasī merī

dasht se barsoñ meñ laa.ī thī hameñ hubb-e-vatan
aur vahshat baḌh ga.ī ujḌā huā ghar dekh kar

tamannā hai fuzūñ hoñ shorisheñ jazb-e-mohabbat kī
dil-e-muztar kī baḌhtī aur bhī vahshat to achchhā thā

ho jā.egā raam rafta rafta
vahshat to miTī jhijak rahī hai

us bayābāñ meñ le ga.ī vahshat
māh-e-nau jis kā ek kāñTā hai

vahshat ke is nagar meñ vo qaus-e-quzah se log
jaane kahāñ se aa.e the jaane kidhar ga.e

ham bhī dīvāne haiñ vahshat meñ nikal jā.eñge
najd ik dasht hai kuchh qais kī jāgīr nahīñ

mujhe vahshat kā matlab kab pata thā aaj se pahle
kabhī aisā huā ye dil zarā ghabrā gayā

merī vahshat ko ye sahrā kī masāfat kam hai
sair ke vāste kuchh aur fazā hī māñgūñ

asar se merī vahshat ke koī jaama nahīñ sābit
maiñ suntā huuñ garebāñ har kafan kā chaak hotā hai