Tags-Wahshat

sair-e-gul bhī hai hameñ bā.is-e-vahshat 'aḳhtar'
un kī ulfat meñ hue chaak garebāñ kyā kyā

halqa-e-reg-e-ravāñ dasht ke dariyā kā bhañvar
vahshat-e-dil ke safīne meñ agar tū nikle

ishq bahrūp thā jo chashm o dil o sar meñ rahā
kahīñ hairat kahīñ vahshat kahīñ saudā ban kar

hazār rañg ye vahshat qadam qadam pe khulī
ki zindagī kī haqīqat qadam qadam pe khulī

māl-e-muflis mujhe samjhā hai junūñ ne shāyad
vahshat-e-dil sar-e-bāzār liye phirtī hai

abhī to zaḳhm purāne na bhuul paa.e haiñ
huzūr phir mirī vahshat pe muskurā.e haiñ

kaun kahtā hai ki vahshat mire kaam aa.ī hai
ye koī aur aziyyat mire kaam aa.ī hai

sahrā hī ġhanīmat hai, jo ghar jāoge logo
vo ālam-e-vahshat hai ki mar jāoge logo

nasīhat hazrat-e-vā.iz kī sunte bhī to kyā hotā
yahī hotā ki ham ko un se vahshat aur ho jaatī

aur vahshat hai irāda merā
haq hai sahrā pe ziyāda merā

tujh se bhī kab huī tadbīr mirī vahshat kī
tū bhī muTThī meñ kahāñ bheñch sakā paanī ko

purvā.ī chal ke aur bhī vahshat baḌhā ga.ī
halkī sī aa ga.ī thī kamī iztirāb meñ

chheḌe vafā kā giit koī naġhma-sāz jab
ḳhud se bhī hone lagtī hai vahshat kabhī kabhī

ab kaun batā.e vahshat meñ kyā khonā hai kyā paayā hai
hāthoñ kā huā shohra bhī bahut dāman ne sahe sadme bhī bahut

junūñ ke paañv meñ chhan kaisī dar aa.ī ki maiñ ne
abhī vahshat ko sahrā meñ utārā hī nahīñ thā

vo khuleñ to ham se rāz-e-dasht-e-vahshat kuchh khule
lauT kar kuchh log aa.e haiñ magar ḳhāmosh haiñ

raat ik phir se guzārī hai kisī vahshat meñ
ek din phir se guzārā hai guzāre vaalā

jab fasl-e-gul aatī hai sadā detī hai vahshat
zanjīr kā gul nāla-e-mastāna hai us kā

sail-e-vahshat ko chhupā.e meñ guzartā hī rahā
ek be-rabt fasāna thā bikhartā hī rahā