Tags-Wahshat

agar vus.at na diije vahshat-e-jāñ ke ilāqe ko
to phir āzādī-e-zanjīr-e-pā se kuchh nahīñ hotā

ye sarāboñ kī sharārat bhī na ho to kyā ho
aañkh meñ hairat o vahshat bhī na ho to kyā ho

mirī be-qarārī mirī āh-o-zārī ye vahshat nahīñ hai to phir aur kyā hai
pareshāñ to rahnā magar kuchh na kahnā mohabbat nahīñ hai to phir aur kyā hai

sañg-zanoñ ke vāste phir na.e rāstoñ meñ hai
vahshat-e-jāñ kā mas.ala shīshe ke jañgaloñ meñ hai

arz-e-vahshat na diyā kar to bagūle itnī
apnī vaadī pe kabhū yaar bhī aa jaate haiñ

phir vahī saudā vahī vahshat vahī tarz-e-jūn.un
haiñ nishāñ maujūd saare ishq kī tāsīr ke

na ham vahshat meñ apne ghar se nikle
na sahrā apnī vīrānī se niklā

khīñch laa.ī hai tire dasht kī vahshat varna
kitne dariyā hī mirī pyaas bujhāne aate

shahr ke ābād sannāToñ kī vahshat dekh kar
dil ko jaane kyā huā maiñ shaam se ghar aa gayā

tajraba ye hai ki har zulf-e-ḳhirad
dast-e-vahshat hī ne suljhā.ī hai

kyā mirā ghar bhī nahīñ haq meñ ki maiñ tanhā rahūñ
itnī vahshat ho rahī hai kyuuñ dar-o-dīvār se

vahshat meñ bhī minnat-kash-e-sahrā nahīñ hote
kuchh log bikhar kar bhī tamāshā nahīñ hote

garebāñ meñ abas kyuuñ jhāñkte ho
tumheñ kaisī ye vahshat ho ga.ī hai

ḳhalvat-e-ābila-e-pā meñ hai jaulāñ merā
ḳhuuñ hai dil tañgī-e-vahshat se bayābāñ merā

hasrat-e-nashsha-e-vahshat na ba-sa.i-e-dil hai
arz-e-ḳhamiyāza-e-majnūñ hai garebāñ merā

jañg vahshat se barbariyyat se
amn tahzīb o irtiqā ke liye

ai gard-bād mat de har aan arz-e-vahshat
maiñ bhī kasū zamāne is kaam meñ balā thā

jab se us shoḳh kī zulfoñ kā liyā hai bosa
baḌh ga.ī aur bhī vahshat dil-e-dīvāne kī

is qadar baḌh ga.ī vahshat tire dīvāne kī
toḌ ke pheñk diiñ sab khuDDiyāñ pāḳhāne kī

jaate hī vādi-e-vahshat meñ qadam maarā maiñ
chaman-e-dahr se dil apnā huā jab ki uchāT