Tags-Wahshat

jāgtā huuñ maiñ ek akelā duniyā sotī hai
kitnī vahshat hijr kī lambī raat meñ hotī hai

jaib o garebāñ TukḌe TukḌe dāman ko bhī taar kiyā
kaise kaise ham ne apnī vahshat kā iz.hār kiyā

ḳhuun umaD aayā ibārat meñ, varaq chīḳh uThe
maiñ ne vahshat meñ tire ḳhat jo jalānā chāhe

ab jazba-e-vahshat kī qasam mat khaao
rah rah ke mohabbat kī qasam mat khaao

kaañp uTTheñ qasr-e-shāhī ke gumbad thartharā.e zamīñ mābadoñ kī
kūcha-gardoñ kī vahshat to jaage ġham-zadoñ ko baġhāvat to aa.e

phuul se taraste hue log ḳharāboñ meñ kahāñ
dasht-e-vahshat meñ koī ābla-pā hī hogā

ḳhāk-e-sahrā to bahut duur hai ai vahshat-e-dil
kyuuñ na zehnoñ pe jamī gard uḌā dī jaa.e

phir aaj shart lagā.ī hai dil ne vahshat se
phir aaj dāman-e-ehsās paak chāhtā hai

vo ek mauj-e-'nasīmī' thī vahshat-e-dil kī
kisī ke hijr meñ jis ko bahā diyā afsos

ye dasht-e-hijr kī vahshat hai sāhibān-e-vafā
yahāñ kisī ko koī aasrā nahīñ miltā

mirī vahshat pe bahs-ārā.iyāñ achchhī nahīñ zāhid
bahut se bāñdh rakkhe haiñ garebāñ maiñ ne dāman meñ

TūTeñ na ḳhaar aur kahīñ phūTeñ na aable
vahshat meñ paañv rakhte haiñ apnā sambhāl ke

vahshat meñ apne haath se pahuñchā hameñ gazand
pachhtā.e āstīn meñ ham saañp paal ke

vaz.a par harf na aa.ī diyā vahshat meñ bhī
lafz-o-ma.anī kī tarah maiñ kabhī uryāñ na huā

davām pā.egā ik roz haq zamāne meñ
ye intizār nahīñ intizār-e-vahshat hai

maut se vahshat hai logoñ ko mohabbat maal se
bāñg-e-be-hañgām hai kūs-e-rahīl-e-kārvāñ

is ehtiyāt-e-dard kī vahshat ki ham kabhī
ḳhud ko tirī nazar se chhupā kar guzar ga.e

vahshat meñ nikal aayā huuñ idrāk se aage
ab DhūñDh mujhe majma-e-ushshāq se aage

dar se vahshat-zadoñ ko ḳhud na uThā
ye koī ek jaa.e baiThe haiñ

josh vahshat kā huā mausam-e-gul aa pahuñchā
kuchh dinoñ hosh meñ rahtā huuñ sambhal jaatā huuñ