Tags-Wahshat

nahīñ barq-o-sharar juz vahshat-e-zabt-e-tapīdan-hā
bilā gardān-e-be-parvā ḳharāmī-hā-e-yār ātish

mo'taqid haiñ hamārī vahshat ke
shahr meñ jis qadar haiñ saudā.ī

bhūlne paa.e na is dasht kī vahshat dil se
shahr ke biich raho baaġh meñ aahū rakkho

ThanDī ThanDī narm havā kā jhoñkā pīchhe chhūT gayā
jaane kis vahshat meñ ghar kā rasta pīchhe chhūT gayā

kisī ne jaam uchhālā ba-nām-e-shām-e-alam
koī malāl kī vahshat chhupā ke baiTh gayā

bahār aa.ī ba-tañg aayā dil-e-vahshat-panāh apnā
karūñ kyā hai yahī chāk-e-garebāñ dastgāh apnā

ḳhvāhish-e-vasl-e-yār to puurī na ho sakī magar
dasht-e-hayāt kaT gayā vahshat-e-intizār meñ

baḌī muddatoñ ke ba.ad jo ab tirī yaad aa.ī to yuuñ lagā
sar-e-dasht-e-vahshat zindagī koī mehrbāñ mire saath hai

un kī vahshat se ye zāhir ho rahā hai ḳhud-ba-ḳhud
ye usī mauza.a meñ rahte haiñ jo hai mañgal ke paas

abtarī āstāna-e-vahshat
rā.egānī azaab kī chaukhaT

vahshat āmāda-e-rusvā.ī hai be-ḳhauf jahāñ
zabt kā hai ye taqāzā ki tamāshā na bane

hameñ tum pe gumān-e-vahshat thā ham logoñ ko rusvā kiyā tum ne
abhī fasl guloñ kī nahīñ guzrī kyuuñ dāman-e-chāk siyā tum ne

chhoTā kamra habs balā kā chhoTī aql ke āshiq ham
vahshat karne jaa.eñ kahāñ jab sahrā pīchhe chhūT gayā

zanjīr-e-mohabbat yūñhī pairoñ meñ sajā kar
vahshat kā tamāshā mirī har baar karo tum

vahshat-e-ātish-e-dil se shab-e-tanhā.ī meñ
sūrat-e-dūd rahā saaya gurezāñ mujh se

bekasī-hā-e-shab-e-hijr kī vahshat hai hai
saaya ḳhurshīd-e-qayāmat meñ hai pinhāñ mujh se

sabr kā dāman hāthoñ se mat jaane do
sabr diloñ kī vahshat kam kar detā hai

chāra-gar kyā mirī vahshat se junūñ bhī hai ba-tañg
roz mujh se mirī zanjīr bigaḌ jaatī hai

guuñj uThā naġhma-e-kun dasht-e-tamannā meñ 'vahīd'
pā-e-vahshat had-e-imkāñ se jo bāhar niklā