Tags-Azaab

ta.alluqāt kā rakhnā bhī toḌnā bhī muhāl
azāb-e-jāñ hai ye rasm-e-vafā bhī mere liye

vahī āhaTeñ dar-o-bām par vahī rat-jagoñ ke azaab haiñ
vahī adh-bujhī mirī niiñd hai vahī adh-jale mire ḳhvāb haiñ

zindagī ne jhele haiñ sab azaab duniyā ke
bas rahe haiñ ā.ankhoñ meñ phir bhī ḳhvāb duniyā ke

kaise guzrī hai umr kyā kahiye
lamha lamha azaab jaisā thā

maut se pahle jahāñ meñ chand sāñsoñ kā azaab
zindagī jo qarz terā thā adā kar aa.e haiñ

kabhī jo āñkhoñ meñ pal-bhar ko ḳhvāb jāgte haiñ
to phir mahīnoñ musalsal azaab jāgte haiñ

murāja.at kā safar to mumkin nahīñ rahā hai
maiñ chaltā jā.ūñ ki mausamoñ kā azaab dekhūñ

chalo ki pahre uThā deñ ham apne jiine se
ye roz qistoñ meñ marnā azāb-e-jān huā

va qinā rabbanā azābannār
sham.a kī hai hamesha ye tasbīh

na.ī mohabbateñ 'ḳhālid' purānī dostiyāñ
azāb-e-kashmakash-e-be-amāñ meñ rahte haiñ

bane haiñ ḳhvāb ke jhoñke nasīm-e-ḳhuld-nashīñ
sulūk-e-dahr jahāñ ātish-e-azāb banā

azāb-e-dīd meñ āñkheñ lahū lahū kar ke
maiñ sharmsār huā terī justujū kar ke

jahāñ pe hotā hai dil pe nuzūl-e-bār-e-azāb
vahīñ se hotā hai duniyā kā ye nizām shurūa

tirī atā ke tasadduq tire karam ke nisār
gunāhgār thā lekin azaab ho na sakā

be-sabāt sub.h shaam aur mirā vajūd
yahī azaab hai mudām aur mirā vajūd

milā hai jurm-e-vafā par azāb-e-mahjūrī
ham apne aap ko is se kaḌī sazā dete

azāb-e-sail-e-musalsal jo de rahā hai mujhe
to sat.h-e-āb pe chalne ko ek naav bhī de

ġharībī naam hai jis kā azāb-e-jān hotī hai
magar daulat kī kasrat mohlik-e-īmān hotī hai

nasha nashe ke liye hai azaab meñ shāmil
kisī kī yaad ko kiije sharāb meñ shāmil

dozaḳh bhī ek jalva-e-fidaus-e-husn hai
jo us se be-ḳhabar hai vahī hai azaab meñ