Tags-Azaab

rāhatoñ ke dhoke meñ iztirāb DhūñDe haiñ
ham ne apnī ḳhātir hī ḳhud azaab DhūñDe haiñ

is dohrī zindagī meñ bhī lākhoñ azaab haiñ
duniyā se dil hai barsar-e-paikār kyā kareñ

diloñ ko zaḳhm diye aur azaab āñkhoñ ko
jo kaam us ne kiye saare munsifāna kiye

apnoñ se ḳhauf hai ki kahīñ ġhair hī na hoñ
hai is se baḌh ke aur jahāñ meñ azaab kyā

ga.e jo aish ke din maiñ shabāb kyā kartā
lagā ke jaan ko apnī azaab kyā kartā

tire azaab meñ mar kar tire darīche se
maiñ jā rahā huuñ mohabbat kā intiqām liye

ye paikar-e-jamāl to itaab ke liye nahīñ
mire ḳhudā ye aadmī azaab ke liye nahīñ

vo tamām gard fanā huī mire jism-o-jāñ pe jo baar thī
tirī ik nazar meñ simaT gayā mire sar pe thā jo azaab sā

mujhe ilm hai
yahī ilm merā surūr hai ye ilm merā azaab hai

ye maanā ham ne ki āzād ho chuke lekin
abhī ġhulāmī ke ham par azaab baaqī haiñ

us vaqt ek sajda baḌe kaam aa gayā
maiñ jab guzar rahā thā anā ke azaab se

merī fariyād ne sukūt ke saath
apne lab ke azaab beche haiñ

tū ye na pūchh mire gaañv meñ haiñ ghar kitne
ye pūchh kaun se ghar meñ azaab kitne haiñ

ye jo zindagī kī kitāb hai ye kitāb bhī kyā kitāb hai
kahīñ ik hasīn sā ḳhvāb hai kahīñ jān-levā azaab hai

maiñ khīñchtā huuñ haath sukūñ kī talāsh se
jab dekhtā huuñ ek jahāñ ko azaab meñ

uThā na der tak ehsān mausam-e-gul kā
maiñ zindagī huuñ mujhe jī mire azaab meñ aa

ye zindagī azaab agar ho to kyā kareñ
ik talḳh sī sharāb agar ho to kyā kareñ

kabhī mausamoñ ke sarāb meñ kabhī bām-o-dar ke azaab meñ
vahāñ umr ham ne guzār dī jahāñ saañs lenā muhāl thā

tire āsmāñ se azaab kyuuñ nahīñ TūTtā
mirī niiñd aur mirā ḳhvāb kyuuñ nahīñ TūTtā

kisī ta.alluq ke TūTne kā azaab donoñ ke dil par utrā
maiñ aks ban ke Thahar gayā thā vo ā.īne kī tarah se chup thā