Tags-Azaab

ulfat se ho ḳhaak ham ko lahnā
qismat meñ to hai azaab sahnā

yahī haiñ rat-jage jab se khulīñ mirī āñkheñ
na thā vo ḳhvāb mirā ik azaab thā mujh ko

qadam qadam pe thakan sāz-bāz kartī hai
sisak rahā huuñ safar kā azaab pahne hue

merā jiite rahnā bhī to ban gayā ek azaab
lekin merā marnā bhī to ho jā.egā qahr

be-fikr huuñ azāb-e-qayāmat siiñ ai 'sirāj'
dīn-e-mohammadī kuuñ kyā huuñ qubūl aaj

sukūn-e-dil kā maqām pūchho vafā kī manzil ke rāhiyoñ se
kaThin hai har din masāfatoñ kā ye ratjagoñ kā azaab kaisā

zāhid mazā to jab hai azaab o savāb kā
dozaḳh meñ bāda-kash na hoñ jannat meñ tū na ho

nazar na aa.e ham ahl-e-nazar ke hote hue
azāb-e-ḳhānā-ba-doshī hai ghar ke hote hue

maiñ māh-o-sāl kā kab tak hisāb likhtā rahūñ
asiir puurī sadī hai azaab ke andar

ishq meñ aabrū ḳharāb huī
zindagī sar-ba-sar azaab huī

ridā-e-jān pe dohrā azaab buntā huuñ
maiñ roz jāgtī āñkhoñ meñ ḳhvāb buntā huuñ

mere armān bah ga.e saare
abr ban kar azaab aa.e the

maiñ apne gulshan meñ mausamoñ ke azaab gin gin ke thak gayā huuñ
maiñ kaise kah duuñ bahār aa.ī maiñ kaise kah duuñ bahār dekhī

ye vahshateñ ye udāsī ye ratjagoñ ke azaab
usī kī haiñ ye ināyāt us se kah denā

umr kā dil hai muzmahil ziist hai dard-e-mustaqil
aise nizām-e-dahr meñ vasvasa-e-azāb kyā

samajh le āshiq o ma.ashūq kī ham-āġhoshī
azaab aur to kyā qabr ke fishār meñ thā

azāb-e-naz.a hī qāsid kā intizār mujhe
ajal hī aa.e agar nāma-bar nahīñ aatā

thī niiñd merī magar us meñ ḳhvāb us kā thā
badan mirā thā badan meñ azaab us kā thā

maiñ is azaab ke nashshe meñ mubtalā huuñ 'kabīr'
parā.ī aag uThā kar mirī sifāl meñ rakh

hikāyat-e-shab-e-hijrāñ likho na ai 'ājiz'
hamārī jān-e-hazīñ kā na ho azaab qalam