Tags-Azaab

jo an-kahe haiñ jo an-sune haiñ vo saare manzar bhī dekh loge
bas apnī āñkhoñ kī chup meñ raushan mohabbatoñ ke azaab rakhnā

terī maujūdgī surūr-āgīñ
terī furqat azaab kī sī hai

agar shu.ūr na ho to bahisht hai duniyā
baḌe azaab meñ guzrī hai āgahī ke saath

havā meñ tair rahe haiñ sahāb miTTī ke
zamīñ pe ā.eñge ik din azaab miTTī ke

ye chhup chhup ke milnā bhī hai ik azaab
koī aa gayā vo koī aa gayā

hameñ azāb-e-qayāmat kā koī ḳhauf nahīñ
ki is se baḌh ke jahāñ meñ qayāmateñ haiñ bahut

ik qayāmat hai aap kā va.ada
chaliye ye bhī azaab ho jaa.e

dayār-e-shauq meñ aa.e the ek ḳhvāb ke saath
guzar rahī hai musalsal kisī azaab ke saath

banā rahā hai falak bhī azaab mere liye
terī zamīn pe kyā imtihān kuchh kam hai

'az.har' ye lamha lamha sulagnā azaab hai
mujh par jo barq girnī hai ik baar gir paḌe

mujhe to aaj ke karb o balā se fursat kab
tum un kī chaap suno jo azaab aa.e nahīñ

kaisā hisāb kyā hisāb hālat-e-hāl hai azaab
zaḳhm nafas nafas meñ hai zahr zamāñ zamāñ meñ hai

ek gumāñ kā haal hai aur faqat gumāñ meñ hai
kis ne azāb-e-jāñ sahā kaun azāb-e-jāñ meñ hai

masīh-e-vaqt ab aa.e to bas ḳhudā aa.e
payambaroñ kī zamīñ aur azaab chāroñ taraf

na koī naqsh na paikar sarāb chāroñ taraf
tamām dasht asīr-e-azāb chāroñ taraf

vo haath maar palaT kar jo kar de kaam tamām
baḌe azaab meñ huuñ maiñ savāb letā jā

azāb-e-qabr se paate haiñ rāhat ishq ke mujrim
pas-e-murdāñ jafā.eñ yaar kī jab yaad karte haiñ

ik azāb-e-jān thī us kī tunak-ḳhūī magar
zā.iqa us dard kā mīThā bhī thā tīkhā bhī thā

tabīb kahte haiñ juz vahm-e-ḳhvāb kuchh bhī nahīñ
to kyā jo ham ne sahe vo azaab kuchh bhī nahīñ

jahāñ meñ nāmvaroñ ke azaab kyā kahiye
zarā sī baat kā charchā zarūr hotā hai