Tags-Azaab

hazār mujh ko malāmat kā sāmnā ho magar
azāb-e-zīst ko kār-e-savāb likkhūñgī

kabhī ek pal bhī na saañs lī khul ke ham ne 'bānī'
rahā umr bhar bas-ki jism o jaañ meñ azaab sā kuchh

ḳharāb-o-ḳhasta hue ḳhaak meñ shabāb milā
hameñ ye dil na milā jaan kā azaab milā

tire hisāb meñ haiñ ḳhush-gumāniyāñ ab bhī
tire bahāne nayā ik azaab māñgūñ maiñ

azāb-e-dīda koī rañg sīñchte kaise
ḳhizāñ-gazīdgī āshufta-bār hotī hai

qismat meñ hamārī 'mus.hafī' haa.e
kyā jaane savāb azaab kyā hai

aas ke saa.e meñ ham sahte rahe kaisā azaab
aag thī qadmoñ-tale aur sar pe bādal chhā.e the

bazm-e-adū meñ aa kar jis tarah ham jale haiñ
dozaḳh meñ ho kisī par aisā azaab shāyad

ai azāb-e-dostī mujh ko batā mere sivā
kaun thā jo tujh ko siine se lagā kar le gayā

paḌā hai shahr meñ chāñdī ke bartanoñ kā rivāj
so is azaab se ab kūza-gar nikaltā hai

'ra.īs' tujh ko to marne kī bhī nahīñ fursat
kahā thā kis ne ki aise azaab paidā kar

rakkhā hai zindagī ko bhī har haal meñ aziiz
jab ki azāb-e-zīst bhī apne gumāñ meñ ho

aa.e to is vaqār se ab ke azāb-e-hijr
sharminda ye bahār bhī ab ke ḳhizāñ meñ ho

daraḳht-e-jāñ par azāb-rut thī na barg jaage na phuul aa.e
bahār-vādī se jitne panchhī idhar ko aa.e malūl aa.e

mujh ko dikhā rahā thā abhī tak vo sabz baaġh
hai zindagī azaab meñ ab kyā hai kuchh nahīñ

nahīñ hai fursat yahīñ ke jhagḌoñ se fikr-e-uqbā kahāñ kī vaa.iz
azāb-e-duniyā hai ham ko kyā kam savāb ham le ke kyā kareñge

raat ulTī pahan ke sotā huuñ
hijratoñ kā azaab jaarī hai

safar azaab sahī dasht-e-gumrahī kā magar
kaTī tanāb to ḳhema ujaḌ hī jaanā thā

azaab ye hai ki tanhā kaTegī umr tamām
safar ke baad koī ham-safar milegā mujhe

azaab ye bhī kisī aur par nahīñ aayā
ki ek umr chale aur ghar nahīñ aayā