Tags-Azaab

har ek jism ruuh ke azaab se niDhāl hai
har ek aañkh shabnamī har ek dil figār hai

kahīñ azaab kahīñ par savāb likhte haiñ
farishte roz hamārā hisāb likhte haiñ

hazar kī āḳhirī had kā azaab honā paḌā
hameñ bhī maslahatan bāzyāb honā paḌā

de to gayā azāb-e-judā.ī mujhe magar
girheñ jo dil meñ thiiñ vo unheñ kholtā gayā

dostoñ kī baat maan lī
saañs bhī azaab ho ga.ī

koī bhī shaḳhs jo vahm-o-gumāñ kī zad meñ rahā
vo tā-hayāt azāb-e-qubūl-o-rad meñ rahā

rifāqatoñ kī shagufta bashārateñ terī
ta.alluqāt ke saare azaab mere liye

machalte rahte haiñ bistar pe ḳhvāb mere liye
utāre jaate haiñ shab bhar azaab mere liye

ab jhelnā paḌegā azāb-e-gunāh-e-ishq
us but-numā ḳhudā ke irāde palaT ga.e

vo jo sūrat thī saath saath kabhī surḳh mahke gulāb kī sūrat
us kī yādeñ utartī rahtī haiñ zehn-o-dil pe azaab kī sūrat

har inqilāb mubārak har inqilāb azaab
shikast-e-jām se pahle shikast-e-jām ke baad

vo hai hī lā.iq-e-sajda so ham ne sajda kiyā
vo aur haiñ jo azaab o savāb dekhte haiñ

kabhī to dard kā sho.ala zabān par bhaḌke
dahaktā ḳhuun ragoñ ke azaab se nikle

ho gayā jis ko vo huā tanhā
ishq bhī ik azaab hai koī

tumhāre sāmne manzar kahāñ qayāmat kā
azaab sahte kabhī kaash tum bhī hijrat kā

vo ik nazar to kuchh na thī ki raah se bhaTak ga.ī
palaT ke us ko dekhnā yahī azaab ho gayā

jaane vaalī sadī sadā bar-lab
aane vaalā azaab paanī hai

der se aañkh pe utrā nahīñ ashkoñ kā azaab
apne zimme hai tirā qarz na jaane kab se

umr-bhar kā azaab ban baiThī
vo jo do-chār din baham guzrī

kyuuñ chheḌte haiñ mujh ko nakīrain qabr meñ
jo so rahā ho us ko jagānā azaab hai