Tags-Wajood

ik bheḌiyā thā dostī kī khaal meñ chhupā
is ne mire vajūd ko khāyā thā aur bas

hai terī aañkh meñ pinhāñ mirā vajūd o adam
nigāh pher le phir dekh kyā se kyā huuñ maiñ

mirā vajūd haqīqat mirā adam dhokā
fanā kī shakl meñ sar-chashma-e-baqā huuñ maiñ

mirā vajūd bhī thā koī chiiz kyā mālūm
is e'tibār se pahle hī miT chukā huuñ maiñ

tirī talāsh hī thī māya-e-baqā-e-vajūd
balā se ham ko sar-e-manzil-e-baqā na milā

tamām shahr meñ bikhrā paḌā hai merā vajūd
koī batā.e bhalā kis tarah chunūñ ḳhud ko

dam ghuT rahā ho jab mirā apne vajūd meñ
kyā ḳhaak tazkira ho firāq-o-visāl kā

tire vajūd pe chhā kar tirī nazar se gire
hamīñ ne raaj kiyā thā hamīñ hue kañgāl

har ek laash meñ kuchh ḳhvāb saañs lete hue
har ik vajūd meñ jaise marā huā sā kuchh

vajūd garche havāoñ kī zad pe thā hamārā
charāġh kī lau hatheliyoñ ke hisār meñ thī

har vajūd apne liye ek savālī thā 'tarāz'
ḳhud ko ham mā.il-e-ab.ād kahāñ tak karte

abhī na kar mirī tashkīl mujh ko naam na de
tire vajūd se bāhar meñ kis shumār meñ huuñ

surḳh ḳhuun shāḳhoñ kā hai vajūd meñ shāmil
dekh kar fazā lekin sabz ho ga.e patte

vajūd-e-ādmī se peshtar hī
sirr-e-ādam qalam hone lagā hai

maiñ nashe meñ tere hī chuur huuñ tire paas ho ke bhī duur huuñ
tū mire vajūd meñ hai nihāñ tirā ġham hī merī sharāb hai

ḳhamosh lahje meñ 'az.har' ko hāshmī ne kahā
tirā vajūd bhī ik ḳhāndāñ se guzrā hai

be-chehragī kī bhiiḌ meñ gum hai har ik vajūd
ā.īna pūchhtā hai kahāñ ḳhadd-o-ḳhāl hai

ghirā huuñ do qātiloñ kī zad meñ vajūd merā na bach sakegā
maiñ zard jañgal se bach gayā to pahāḌ ik mushta.il milegā

vo na hote mirā vajūd na thā
maiñ na hotā vo kis shumār meñ haiñ

chhoḌ jaate haiñ kahīñ paas tire apnā vajūd
ghar pahuñch kar bhī to ham ghar meñ kahāñ hote haiñ