Tags-Wajood

kahāñ TuuTe merī tanāb-e-jism ke hausle
jo lagā thā ḳhema vajūd kā vo kahāñ gayā

na jaane kaun sī manzil mirā makāñ hotī
ki maiñ vajūd kī gaThrī agar uThā letā

mire vajūd pe qābiz huā vo pal bhar meñ
nazar kī teġh se dil ko ġhulām karte hue

jahāñ pe aa ke mukammal hue vajūd tamām
adhūrā ho ki akelā vahāñ se lauTā huuñ

maiñ jin ke ham-rāh chal rahā huuñ vo sab isī ḳhaak kī numū haiñ
magar jo mere vajūd meñ hai vo ḳhvāb hai aur hī kahīñ kā

achchhā huā ki aap ne dāman jhaTak diyā
merā vajūd aap ke dāman pe gard thā

pahle to DhūñDh-DhāñDh ke laa.e vajūd ko
aur phir hañkā ke zaat ko mahmil pe laa.e haiñ

mujh ko mire vajūd se koī nikāl de
tañg aa chukā huuñ roz ke in hādsoñ se maiñ

liye to phirtā huuñ ik mausam-e-vajūd ko maiñ
bahār hai ki ḳhizāñ hai mujhe nahīñ mālūm

adhūrī shakl adhūrī nazar adhūrā vajūd
ajiib shaḳhs mujhe kal vahāñ dikhā.ī diyā

zamīñ pe aag falak par dhuāñ dikhā.ī diyā
mirā vajūd kahīñ darmiyāñ dikhā.ī diyā

havāo dil kī taraf ehtiyāt se jaanā
vajūd amn kā hai qaa.em hubāb kī sūrat

maiñ raushnī huuñ añdherā huuñ dard huuñ kyā huuñ
mire vajūd se mujh ko nikāl kar dekho

lamhoñ ke azaab sah rahā huuñ
maiñ apne vajūd kī sazā huuñ

jaltā huā charāġh agar hai mirā vajūd
phir apne dil ke taaq meñ jalne to de mujhe

mirā vajūd havāla tirā huā āḳhir
to khā gayā nā mujhe tū mire savāl-e-qadīm

mirā vajūd bhī hai aap kī jabīn kā daaġh
use bhī harf-e-ġhalat kī tarah miTā diije

mire vajūd ke dozaḳh ko sard kar degā
agar vo abr-e-karam hai to khul ke barsegā

vajūd shola-e-sayyāl ho gayā hai 'shamīm'
uThī hai aañch ajab dil ke ābgīne se

ik khulā dahāna sā jis kī tah bhī hai ḳhālī
be-muzāhamat vus.at be-vajūd maujūdī