Tags-Waqt

vaqt kā kuchh rukā sā dhārā hai
tum ne shāyad mujhe pukārā hai

bachpan saheliyāñ vo hama-vaqt kī hañsī
'amabar' vo zindagī ke ḳhazāne kahāñ ga.e

vaqt-e-ruḳhsat chalte chalte kah ga.e
ab jo ar.māñ rah ga.e so rah ga.e

abhī ye bahs 'nādir' vaqt kī chaukhaT pe rakhte haiñ
ye kal dekheñge kis kā kaam meyārī ziyāda hai

ab kisī dost se koī shikva nahīñ
vaqt ke saath sab zaḳhm bharne lage

aaj bichhaḌte vaqt mujhe ma.alūm huā
logoñ meñ ehsās kā ḳhāna hotā hai

gardish-e-vaqt us kī shāhid hai
āsmāñ tak mirī rasā.ī thī

be-kār na vaqt ko guzāro yaaro
yuuñ sust paḌe paḌe na himmat haaro

vaqt-e-girya mauzūñ ho kyuuñ na aah kā misra.a
rafta rafta ashk apnā ban gayā fuġhānī yaañ

us vaqt mujh ko dāvat-e-jām-o-subū milī
jis vaqt maiñ gunāh ke qābil nahīñ rahā

dostoñ ko bhī rahī vaqt kī qillat 'aḳhtar'
hāl-e-dil ham ne sunāne kī bhī aadat nahīñ kī

koī vaqt batlā ki tujh se milūñ
mirī dauḌtī bhāgtī zindagī

jinheñ saath chalnā ho chalte raheñ
ghaḌī vaqt kī kis kī ḳhātir rukī

vaqt marne kā jo aa.egā to mar jā.ūñgā
mere nazdīk ye mushkil koī mushkil meñ nahīñ

jab dil pe chhā rahī hoñ ghaTā.eñ malāl kī
us vaqt apne dil kī taraf muskurā ke dekh

jo vaqt par hī na kaam aa.eñ to dost kyā haiñ aziiz kyā haiñ
kisī dukāñ par nahīñ chale jab ye khoTe sikke to log samjhe

koī na maane karāhateñ jab batā rahī thiiñ ki vaqt kam hai
jab un ke kāñdhoñ pe āḳhirī ham safar ko nikle to log samjhe

mohabbat vaqt se pahle to kar lī
ghaḌī kā shauq kaise ho rahā hai

mumkin hai ki tujh ko ab tak ḳhaak nazar na aatā ho
vaqt balā kā shātir hai vo chāleñ chaltā jā.egā

vaqt ne zehn meñ dhuñdlā diye tere ḳhad-o-ḳhāl
yuuñ to maiñ TūTte tāroñ kā dhuāñ tak dekhūñ