Tags-Waqt

vaqt rahtā nahīñ kahīñ Tik kar
aadat is kī bhī aadmī sī hai

sahar ke vaqt jab sūraj nikalnā chāhtā hai to
falak kī god meñ tāroñ kā lashkar TuuT jaatā hai

ajal se pūchh lo aane meñ der kyuuñ kar dī
ki nāgavār hai is vaqt intizār mujhe

vo āftāb jise sab salām karte haiñ
jo vaqt par na Dhale jal ke raakh ho jaa.e

ye vaqt-e-javānī hai gañvā is ko na 'hamdam'
nādān ibārat ke liye umr paḌī hai

jis vaqt nazar aayā tirī zulf kā saaya
us vaqt kahā dil ne yahāñ chhāñv ghanī hai

sabhī zad meñ haiñ dasht-o-koh-o-insāñ
ye zarb-e-vaqt hai kaarī bahut hai

tīkhe to ho pa sach kaho us vaqt kyā karo
tum ko gale lagā le agar pyaar se koī

maiñ apne vaqt meñ apnī ridā meñ rahtā huuñ
aur apne ḳhvāb kī āb-o-havā meñ rahtā huuñ

thā guzarāñ guzar gayā vaqt-e-visāl aur bas
ḳhaak bhī chhāntā phirā phir na kabhī milā mujhe

sabr karo muhāsibo vaqt tumheñ batā.egā
dahr ko maiñ ne kyā diyā dahr se kyā milā mujhe

vaqt ke saath badalne lagā har ik 'shafīq'
jaise ab mujh se kisī kā koī rishta hī nahīñ

tumheñ bhī vaqt kī raftār kā pata chaltā
nikal ke ghar se galī tak to aa ga.e hote

vaqt hai teshā-o-shamshīr kā jis meñ kab se
vo hathelī abhī masrūf-e-duā hai yaksar

zindagī pyaas se mānūs na ho jaa.e kahīñ
vaqt ke dasht meñ ik lamha-e-tar aane tak

dukhoñ kā kyā hai mujhe fikr hai ki us ne kyuuñ
bichhaḌte vaqt bhī lahje ko ḳhush-gavār rakhā

vaqt-e-ruḳhsat jo mujhe pyaar se dekhā tum ne
is se baḌh kar mirā sāmān-e-safar kyā hogā

vaqt hai kar lo marammat abhī ghar kī 'betāb'
abhī rauzan nahīñ zāhir hue dīvāroñ meñ

dil kī zamīñ par bo.e the 'bāqar' biij jo dard judā.ī ke
chaliye ab vo fasl khaḌī hai vaqt aayā hai kaTā.ī kā

ik aisā vaqt bhī aatā hai zindagī meñ kabhī
jab apne saa.e se pīchhā chhuḌānā paḌtā hai