Tags-Waqt

ajiib vaqt hai zāhid ko bhī 'zahīr' ab to
sharāb lagtā hai mere gilās kā paanī

vaqt vo thā ki ḳhad-o-ḳhāl numāyāñ the mire
ab ye hālat hai ki bas ik hayūlā huā maiñ

har vaqt mere lab pe rahī hai yahī duā
mil jaa.e vo ki jis kā mirā dil murīd hai

ḳhudā ke haath meñ mat sauñp saare kāmoñ ko
badalte vaqt pe kuchh apnā iḳhtiyār bhī rakh

zamāna furqat kā jaa.e yā-rab vo vaqt vo din bhī aa.e yā-rab
adā karūñ maiñ tirā dogānā khaḌe raheñ vo bichhā ke āñchal

har vaqt mire saath the asbāb-e-tabāhī
qismat thī ḳharāb apnī ḳhatā.eñ bhī bahut thiiñ

vaqt aane pe galā apnā dabā saktā huuñ
itnī kamzor mirī zaat na samjhī jaa.e

jis qadar mahmez kartā huuñ maiñ 'sājid' vaqt ko
us qadar be-sabr rahne kī use aadat nahīñ

jabīn-e-vaqt par likkhī huī sachchā.iyāñ raushan rahī haiñ
tā-abad raushan raheñgī

masīh-e-vaqt to aisī nafas sahī lekin
ilaaj hai koī zaḳhm-e-dil-o-jigar ke liye

'faizī' kitne bā-vafā hote haiñ dost
vaqt paḌte hī patā chal jā.egā

taptā sūraj shaam ko Dhal jā.egā
vaqt kaisā hī paḌe Tal jā.egā

vaqt kī tez havāoñ ne ajab moḌ liyā
phuul se haath jo the un meñ bhī patthar nikle

fareb-e-ārzū pe aur e'tibār ke liye
uThāo jaam vaqt kam hai vaqt ho chukā bahut

vaqt ke saath to ehsās bhī miT jaatā hai
kis ko ma.alūm ki ab dard kahāñ hone lagā

vaqt kā ThāTheñ mārtā sāgar
ek hī pal meñ simaT gayā thā

kho gayā hai aadmī be-chehragī ke dasht meñ
le uḌā hai vaqt ā.īnoñ ke jauhar kaaT kar

pā.ūñgī jurm-e-mohabbat kī anokhī sī sazā
vaqt ke hoñToñ pe maiñ ik an-kahī rah jā.ūñgī

vaqt ne kis aag meñ itnā jalāyā hai mujhe
jis qadar raushan thā maiñ us se sivā raushan huā