Tags-Waqt

ye vaqt kī sāzish hai ki sūraj kī sharārat
saa.e mirī dīvār ke us paar bahut haiñ

vaqt kī chāragarī bhī dekhiye kyā ḳhuub hai
ġham davā meñ Dhal gayā aur zaḳhm mahram ho ga.e

koī āvāz koī guuñj nahīñ
vaqt chup-chāp hai sahrā kī tarah

ye misrā likh diyā kis shoḳh ne mehrāb-e-masjid par
ye nādāñ gir ga.e sajdoñ meñ jab vaqt-e-qayām aayā

riyāz-e-vasl se vaqt-e-saqīmī
na haath aa.ī kabhī sarmaq kisī ko

uThāo haath ki vaqt-e-qubūliyat hai yahī
duā karo ki duāoñ meñ ab asar jaage

ik ālam-e-jāñ vo hotā hai taḳhsīs nahīñ jis meñ koī
is vaqt hamārī bāñhoñ meñ jo aa.e vo dilbar ho jaa.e

kab dil kā laḌakpan jā.egā har vaqt yahī hai zid us kī
jo māñge usī pal mil jaa.e jo soche vahīñ par ho jaa.e

vaqt ne sab bhulā diyā 'partav'
ishq kyā shai hai āshiqī kyā hai

abhī jī bhar ke pī lo phir na jaane kis pe kyā guzre
qarīb ab shaiḳh-jī ke va.az farmāne kā vaqt aayā

shabāb aayā taḌapne aur taḌpāne kā vaqt aayā
agar sach pūchhiye be-maut mar jaane kā vaqt aayā

na ho jaa.e kahīñ phir aap se tum tum se tū 'āzam'
hudūd-e-aql se bāhar nikal jaane kā vaqt aayā

ghaTā chhā.ī barasne ko haiñ būñdeñ abr-e-nīsāñ se
nahīñ piite jo nādāñ un ko samjhāne kā vaqt aayā

unheñ pās-e-hayā Thahrā to apne paañv larzāñ haiñ
hamārī jur.atoñ kā un ke sharmāne kā vaqt aayā

zehn aur dil meñ fāslā hī rahā
vaqt zaḳhmoñ se kheltā hī rahā

ab to alfāz ke chehroñ kī ḳharāsheñ paḌh kar
vaqt ko Taal diyā jaa.e gadāgar kī tarah

hai vaqt yā shu.ūr ye guzrā hai jo abhī
tum bhī 'ḳhalish' zabān ajab bolne lage

ghar se hijrat pe nikal jaanā thā lamhoñ kā amal
phir kahīñ basne basāne meñ baḌā vaqt lagā

ḳhvāhish-e-dīd ke iz.hār meñ bhī der lagī
un ko bhī parda uThāne meñ baḌā vaqt lagā

kaise hālāt kī daldal se nikalte ki 'vaqār'
paañv bhī ham ko jamāne meñ baḌā vaqt lagā