Tags-Waqt

yahāñ se jo dekho to jaise... kahīñ hadd-e-imkāñ talak
gum-shuda vaqt jaisī añdherī guphā hai

jaane vaale vaqt ne dekhā thā muḌ kar ek baar
go hameñ pahchāntā kam thā magar bhūlā na thā

muñh se duā nikal hī ga.ī vaqt-e-qatl bhī
kahnā ye thā ki haqq-e-mohabbat adā huā

vaqt kī sa.ī-e-musalsal kārgar hotī ga.ī
zindagī lahza-ba-lahza muḳhtasar hotī ga.ī

dekhā jo shab-e-hijr to royā maiñ ki us vaqt
yaad aayā shab-e-vasl ke auqāt kā aalam

ho umr-e-ḳhizr bhī to ho ma.alūm vaqt-e-marg
ham kyā rahe yahāñ abhī aa.e abhī chale

apnī tabāhiyoñ pe bhī khul ke na ro sake kabhī
vaqt hī kab milā hameñ rañj-o-malāl ke liye

ishq vāloñ kī fuġhāñ zabt-e-fuġhāñ hotī hai
āshiq-e-vaqt ko ye baat batā dī jaa.e

vaqt kī daldal meñ ḳhush-āhañg lamhe dhañs ga.e
ya.anī har saa.at sukūt-e-shab kī hai maarī huī

sar ḳham ho agar maslahat-e-vaqt ke aage
is jabr-e-musalsal ko ibādat na samajhnā

nuur kī kiran us se ḳhud nikaltī rahtī hai
vaqt kaTtā rahtā hai raat Dhaltī rahtī hai

jis vaqt ham ne jhuum kar azm-e-safar
lākhoñ charāġh rāh-e-mohabbat meñ jal ga.e

maiñ apne vaqt kā mansūr bhī nahīñ 'hasrat'
ye log kis liye laa.e haiñ daar par mujh ko

beTā beTī phone par akasr batāte haiñ mujhe
vaqt miltā hī nahīñ hai gaañv aane ke liye

qabr apnī khod kar ḳhud leT jaao ek din
vaqt kis ke paas hai miTTī uThāne ke liye

ye vahshatoñ ko baḌhāne kā vaqt hai shāh-jī
ki ḳhushbūoñ kā koī silsila nahīñ miltā

dekhā huā sā kuchh hai to sochā huā sā kuchh
har vaqt mere saath hai uljhā huā sā kuchh

vo jo harf-e-haq thā likhā gayā kisī shaam ḳhuun se ret par
hai gavāh mauja-e-vaqt bhī ki vo harf us se miTā nahīñ

ba-vaqt-e-ā.īna dīdan bulā.ūñ maiñ to kahe
maiñ apne āshiq-e-mā.il se baat kartā huuñ