Tags-Waqt

hākim-e-vaqt ye hijrat mujhe manzūr magar
dam-e-ruḳhsat mujhe sāmān-e-safar bhī denā

ḳhuub hai vaqt jo kaT jaatā hai
jo guzar jaate haiñ dam achchhe haiñ

nāḳhun-e-vaqt ne har naqsh khurach Daalā hai
merā chehra mirī pahchān huā kartā thā

zehn-o-dil is liye sargarm-e-amal rahte the
rahnumā.ī mirī har vaqt ḳhudā kartā thā

kaa.ī hoñToñ pe hama-vaqt jamī rahtī thī
ek dariyā mirī āñkhoñ meñ thamā kartā thā

ham to us vaqt bhī raushan the kisī goshe meñ
jab zamāne ko charāġhoñ kī zarūrat kam thī

mohabbatoñ ke basere nahīñ makānoñ meñ
humakte bachchoñ pe āseb-e-vaqt kā saayā

vaqt huuñ aur baḌī muddat se
maiñ tire saath zamāne lagā huuñ

vahāñ jo log anāḌī haiñ vaqt kāTte haiñ
yahāñ bhī kuchh mutashā.er dimāġh chāTte haiñ

na tirī adā meñ vo dilkashī na mirī ġhazal meñ vo tāzgī
vo ġhubār-e-vaqt meñ dab ga.ī jo kashish thī husn-o-jamāl meñ

jab bhī āñkhoñ meñ tirī ruḳhsat kā manzar aa gayā
āftāb-e-vaqt neze ke barābar aa gayā

sūjhtā kuchh nahīñ us vaqt miyāñ apne ta.iiñ
yaad jis vaqt tirī mū kamar aa jaatī hai

go ham charāġh-e-vaqt ko raushan na kar sake
par apnī zaat se to añdherā nahīñ kiyā

naḳhvat-parast logoñ ko chhoḌ un ke haal par
vaqt un ke ḳhud nikālegā bal rāsta badal

kisī ke hijr meñ qurbān raat karte hue
kaTā hai vaqt sitāroñ se baat karte hue

bachā hai kaun yahāñ vaqt ke thapeḌoñ se
hai merī umr-e-gurezāñ bhī māh-o-sāl meñ gum

vaqt ne kar diyā jo karnā thā
koī martā hai to mar jaa.e jī

go mā-varā-e-vaqt bhī hai mujh meñ ek chiiz
mīzān-e-sub.h-o-shām meñ taulā gayā huuñ maiñ

jis kā hal sochne meñ vaqt lage
vo mohabbat hai mas.ala nahīñ hai

vaqt kamzor hī ko chuntā hai
aur kamzor the hamīñ shāyad