Tags-Waqt

har vaqt hai dushnām har ik baat meñ taana
phir us pe bhī kahtā hai ki maiñ kuchh nahīñ kahtā

yuuñ to ik jur.a-e-sharāb huuñ maiñ
gardish-e-vaqt kā javāb huuñ maiñ

ye zamāna kaisā badal gayā na vo valvale na vo hausle
kisī vaqt the jo sanam-shikan vo haiñ aaj vaqf-e-sanam-girī

gardan hai jhukī nazreñ nīchī aur lab pe hai un ke tabassum bhī
hai qābil-e-dīd vo shoḳhī bhī jis vaqt ki vo sharmāte haiñ

roz milne pe bhī lagtā thā ki jug biit ga.e
ishq meñ vaqt kā ehsās nahīñ rahtā hai

kis vaqt meñ basā thā ilāhī ye mulk-e-dil
sadme hī paḌte rahte haiñ nit is dayār par

burā jab vaqt aatā hai to is duniyā-e-ulfat meñ
koī monis nahīñ hotā koī hamdam nahīñ hotā

yahī vo vaqt hai jab aadmī ko hosh aatā hai
ḳhudā kī yaad se ġhāfil Dil-e-pur-ġham nahīñ hotā

ibn-e-ādam huuñ maiñ shahzāda-e-ta.amīr-e-hayāt
tū jo bigḌā ho to ai vaqt sañvar jā mujh meñ

apne ko kitne saañp se Dasvā rahe haiñ ham
mas.hūr haiñ ki vaqt kī nāgin hasīñ bhī hai

tārīkiyoñ meñ vaqt kī raftār kho ga.ī
ye shām-e-ġham hai yā tirī zulf-e-darāz hai

vaqt-e-ruḳhsat nishānī jo talab kī to kahā
daaġh kaafī hai judā.ī kā agar yaad rahe

rañg lā.eñgī tamannā.eñ zarā sabr karo
vaqt lagtā hai duāoñ ko asar karne meñ

ḳhat-e-to.am kī tarah āshiq o māshūq haiñ ek
donoñ bekār haiñ jis vaqt judā.ī ho jaa.e

yahī har uzv se aatī hai sadā furqat meñ
vaqt ye vo hai judā bhaa.ī se bhaa.ī ho jaa.e

haa.e us vaqt ko kosūñ ki duā duuñ yaaro
jis ne har dard mirā chhīn liyā hai mujh se

ab ai nigah-e-shauq na rah jaa.e tamannā
is vaqt udhar se vo idhar dekh rahe haiñ

sochne meñ vaqt 'nīraj' mat lagānā bhuul kar
pyaar qātil se bhī kar gar vo tujhe bhāne lagā

aañkh se chipke nazāroñ ke hazāroñ daaġh haiñ
jo vaqt kī bārish se bhī dhulte nahīñ

maiñ musāfir nahīñ āvāra-e-manzil huuñ 'bashīr'
gardish-e-vaqt ne ye dekh ke dam toḌ diyā