Tags-Waqt

vo lamha-e-avval ki tū jab aañkh meñ utrā
vo vaqt bhī kyā thā ki ghaḌī se nikal aayā

ek sannāTā zamīñ se āsmāñ tak chhā gayā
vaqt ke māthe pe halkā sā pasīna aa gayā

vaqt kā maarā huā insāñ ra.ūnat kā shikār
jis kī mehnat kā natīja azmat-e-sarmāya-dār

sub.h sunahrī kyuuñ hai itnī shaam meñ itnī laalī kyuuñ hai
vaqt ne shāyad terī aañkh kī shabnam se muñh dhoyā hogā

vaqt ke har ik naqsh kā ma.anī itnā badlā badlā hogā
mere vahm-o-gumān meñ kab thā ishq kā manzar aisā hogā

rafta rafta pahnūñgā saare makhoTe sab kavach
vaqt do ai shahr vaalo dasht se aayā huuñ maiñ

bahut hai fursat-e-dīvāngī kī hasrat bhī
'vahīd' vaqt gar izn-e-ġhazal-sarā.ī na de

ik taraf vaqt ke muñh-zor bagūloñ kā hujūm
ik taraf zard sā pattā hai ḳhudā ḳhair kare

shaam hai ek sitāra hai sar-e-charḳh-e-vafā
maañg us vaqt koī dil se duā āhista

vo jo barf abhī thī jamī huī kisī maslahat ke hisār meñ
zarā vaqt kī jo havā lagī to vo ek pal meñ pighal ga.ī

koī salīb pe kyā soch ke laTaktā hai
masīh-e-vaqt se pūchhe zarā koī ye raaz

bichhaḌte vaqt bhī dil kuchh na bolā
ye pāgal zabt kar ke rah gayā thā

raat guzarte shāyad thoḌā vaqt lage
dhuup unDelo thoḌī sī paimāne meñ

tū mirī ḳhātir guzartā vaqt hai
aur maiñ terī ghaḌī se kam nahīñ

hairān huuñ ki itnī riyāzat ke bāvajūd
kyuuñ vaqt ko ġhubār nahīñ kar rahe haiñ log

ḳhud se laḌtā huuñ to lagtā hai ki ran meñ 'rāhat'
vaqt ne qāfila-sālār kiyā hai mujh ko

tum se milnā bhī nahīñ tum se bichhaḌnā bhī nahīñ
vaqt ke jaise magar ham ko badalnā bhī nahīñ

kuchh vaqt kī qurbat ke liye lauT rahā hai
tanḳhvāh meñ chhuTTī kā talabgār sipāhī

vaqt mahñgā ho rahā thā lafz bhī kamyāb the
shā.iroñ ko ḳhvāb bunñe meñ bhī āsānī na thī

zindagī thaam liyā karte haiñ baḌh kar lamhe
vaqt aane pe badalte haiñ muqaddar lamhe