Tags-Waqt

vaqt vo mehmān hai 'hassān'
jo kabhī lauT kar nahīñ aatā

umr bhī lauT kar nahīñ aatī
vaqt bhī lauT kar nahīñ aatā

qurb-o-dūrī to faqat vaqt kī majbūrī hai
har ghaḌī aane kā imkāñ hai ye ehsāñ kam hai

'hasn-jamīl' banāyā thā is ne dil se mujhe
kisī bhī vaqt magar vo miTā bhī saktā hai

chup-chāp sitam vaqt ke maiñ sah to rahī huuñ
dekho na banā de ye tamāshā dil-e-nādāñ

ye mire naqsh-e-qadam vaqt se miT sakte haiñ
apne siine se lagā.e hai jinheñ terī galī

TuuT jaa.e na kahīñ shīsha-e-paimān-e-vafā
vaqt be-rahm hai patthar ke ḳhudāoñ kī tarah

vo murda-dilī shaam se pahle kī adā thī
is vaqt to 'kaifī' kisī maqtal meñ milegā

vaqt kitne zor se hañsne lagā
ishq jab shartoñ pe āmāda huā

jugnū ko din ke vaqt parakhne kī zid kareñ
bachche hamāre ahd ke chālāk ho ga.e

vaqt aane de dikhā deñge tujhe ai āsmāñ
ham abhī se kyuuñ batā.eñ kyā hamāre dil meñ hai

marne vaalo aao ab gardan kaTāo shauq se
ye ġhanīmat vaqt hai ḳhanjar kaf-e-qātil meñ hai

chand adhūre kāmoñ ne kuchh vaqt girafta logoñ ne
din purze purze kar Daalā raat ko paara paara kiyā

na kī kis ne sifārish merī vaqt-e-qatl qātil se
kamāñ ne haath joḌe teġh ne qadmoñ pe sar rakkhā

pal meñ jahāñ ko dekhte mere Dubo chukā
ik vaqt meñ ye diida bhī tūfān ro chukā

merī ġhazleñ us ke saath bitā.e vaqt kā hāsil haiñ
vaisī fasleñ ug aatī haiñ jaisī bārish ho jaa.e

mirī jaan aaj kā ġham na kar ki na jaane kātib-e-vaqt ne
kisī apne kal meñ bhī bhuul kar kahīñ likh rakhī hoñ masarrateñ

ai vaqt tū kahīñ bhī kisī kā huā hai kyā
kyā tujh ko dekhnā tirī saa.at ko dekhnā

koī hai ittilā.a is vaqt kar de jā ke thāne par
vo mere qatl par khīñche hue talvār baiThe haiñ

vo shai jo baiThtī hai chhup ke nañge peḌoñ meñ
guzarte vaqt bahut tāliyāñ bajātī hai