Tags-Waqt

mizrāb-e-vaqt chheḌe tū 'kausar' sunā.ī de
āvāz gum hai saaz ke tāroñ kī god meñ

diloñ kā dard kahāñ jaam meñ utartā hai
harīf-e-vaqt ko ham ġharq-e-bāda karte haiñ

ham hī to the jo vaqt pe hī kaam aa ga.e
achchhā huā ki ham se adāvat huī nahīñ

jabīn-e-vaqt pe sabt apnā naqsh us ne kiyā
diloñ ke daaġh charāġh-e-haram banāte hue

soch kar arz-e-talab vaqt ke sultān se kar
māñgne vaale tirī baat na ḳhālī jaa.e

vaqt kī baat hai yaad aa jaanā lekin us kī baat na pūchh
yuuñ to lākhoñ bāteñ niklīñ terā hī mazkūr rahā

jo dasht-e-tamannā meñ har vaqt bhaTaktā hai
insān kā dil aisā ma.asūm parinda hai

is vaqt ham se pūchh na ġham rozgār ke
ham se har ek ghūñT ko kaḌvā kiyā na jaa.e

alag siyāsat-e-darbāñ se dil meñ hai ik baat
ye vaqt merī rasā.ī kā vaqt hai ki nahīñ

ḳhalal-pazīr huā rabt-e-mehr-o-māh meñ vaqt
batā ye tujh se judā.ī kā vaqt hai ki nahīñ

havā kī narm-ravī se javāñ huā hai koī
fareb-e-tañg-qabā.ī kā vaqt hai ki nahīñ

kaho sitāra-shanāso falak kā haal kaho
ruḳhoñ se parda-kushā.ī kā vaqt hai ki nahīñ

diloñ kī uqda-kushā.ī kā vaqt hai ki nahīñ
ye aadmī kī ḳhudā.ī kā vaqt hai ki nahīñ

diloñ ko markaz-e-asrār kar ga.ī jo nigah
usī nigah kī gadā.ī kā vaqt hai ki nahīñ

mujh ko masrūf bhī rakkhegā koī kār-e-abas
vaqt-e-masraf pe ye bekār karegī duniyā

jhuuT kā Dañkā bajtā thā jis vaqt 'jamīl' is nagrī meñ
har raste har moḌ pe ham ne sach ke alam lahrā.e haiñ

lift khambe tū aur maiñ peḌ pahāḌ
vaqt vaadī meñ jam gayā kaisā

bād-az-vaqt pashīmāñ ho kar zaḳhm nahīñ bhar sakte tum
dāman ke dhabbe albatta miT sakte haiñ dhone se

merī shaguftagī kā bhī aa.egā ek vaqt
mahke na jo kabhī vo gulistāñ nahīñ huuñ maiñ

ḳhud vaqt ko miltā hai sukūñ terī galī meñ
sunte haiñ vahāñ gardish-e-ayyām nahīñ hai