Tags-Waqt

kahtī haiñ tujhe mai-kada-e-vaqt kī rāheñ
bigḌī huī taqdīr ko suljhā ke guzar jā

is se pahle ki mujhe vaqt alāhida rakh de
mere hoñToñ pe mire naam kā bosa rakh de

tum ne har vaqt hī ḳhushiyoñ ke ujāle dekhe
ġham kī hotī hai siyah raat tumheñ kyā ma.alūm

kab baras jaa.eñ in āñkhoñ kā bharosa hī nahīñ
kaun be-vaqt kī barsāt meñ ghar se nikle

rahtā thā kabhī merī nigāhoñ meñ shab-o-roz
ik vaqt thā jab vo mirā mahbūb-e-nazar thā

zulm ko us ne zulm kahā hai jabr ko us ne jabr kahā
ya.anī 'ziyā' ab 'ziyā' nahīñ hai vaqt kā vo mansūr huā

ai dasht-e-tamannā meñ bhaTakte hue aahū
tū kaun hai kis vaqt kī rah dekh rahā hai

kis qadar jald uḌ gayā yaaro
vaqt rañg-e-shabāb jaisā thā

badle badle lagte ho hai chehre par anjānā-pan
yā vaqt ke hāthoñ farq aayā merī hī bīnā.ī meñ

kabhī aa.egā vaqt 'mahtāb' apnā
bahut ham ne un ke zamāne bhī dekhe

ḳhudā ai kaash 'nāzish' jīte-jī vo vaqt bhī laa.e
ki jab hindostān kahlā.egā hindostān-e-āzādī

kahnā to bahut kuchh hai magar maslahat-e-vaqt
be-āb se haiñ sho.ala-o-shabnam use kahnā

jab bhī Thahre hue paanī kī tarah marne lagā
kaam usī vaqt mirā azm-e-safar aayā hai

nazar aatī hai duniyā ik ibādat-gāh-e-nūrānī
sahar kā vaqt hai bande ḳhudā ko yaad karte haiñ

havā-e-tāza pā kar bostāñ ko yaad karte haiñ
asīrān-e-qafas vaqt-e-sahar fariyād karte haiñ

jab qazā likh hī chukī silsila-e-rāh-e-fanā
kyuuñ na phir vaqt-e-ajal jald bulāyā jaa.e

hijr meñ maut bhī aa.ī na mujhe sach hai masal
vaqt par kaun kisī ke koī kaam aatā hai

maiñ ruk gayā chaḌhī huī naddī ke sāmne
kuchh vaqt mere paas thā barsāt ke liye

vaqt kī sa.ī-e-musalsal kārgar hotī ga.ī
zindagī lahza-ba-lahza muḳhtasar hotī ga.ī

sahar ke vaqt huā faisla nikalne kā
qadam baḌhāne se pahle diye baḌhā.e ga.e