Tags-Waqt

is duniyā meñ rah kar ham ne dekhā hai 'jāñbāz' yahī
vaqt paḌe to kar lete haiñ matlab ke yārāne log

thī ek bhiiḌ magar ham-safar na thā koī
safar ke vaqt judā.ī kā Dar na thā koī

badalte vaqt ki raftār thāmte haiñ huzūr
badalte rahte haiñ aksar jo Topiyāñ apnī

vaqt banjārā-sifat lamha ba lamha apnā
kis ko mālūm yahāñ kaun hai kitnā apnā

kal aur koī vaqt kī āñkhoñ meñ ho to kyā
ab tak to har nigāh kā mehvar rahe haiñ ham

baiThā nahīñ huuñ sāya-e-dīvār dekh kar
Thahrā huā huuñ vaqt kī raftār dekh kar

girya har vaqt kā nahīñ be-hech
dil meñ koī ġham-e-nihānī hai

rashk-e-yūsuf hai aah vaqt-e-azīz
umr ik bār-e-kārvānī hai

ye 'mīr'-e-sitam-kushta kisū vaqt javāñ thā
andāz-e-suḳhan kā sabab shor o fuġhāñ thā

kuchh aisā mujh ko gumāñ thā tufail-e-marham-e-vaqt
koī bhī ghaav ho ik roz bhar hī jaatā hai

gilā faqat hai ye zāhid kī pārsā.ī se
zarā sā vaqt paḌā un ke sab usuul ga.e

thamī na yalġhār-e-vaqt kahtā hī rah gayā maiñ
abhī maiñ itnā hī bojh uThā luuñ yahī bahut hai

kab ḳhuuñ meñ bharā dāman-e-qātil nahīñ ma.alūm
kis vaqt ye dil ho gayā bismil nahīñ ma.alūm

rakh diyā vaqt ne ā.īna banā kar mujh ko
rū-ba-rū hote hue bhī maiñ farāmosh rahā

is tarah sarsarī mirā bāb-e-vafā na likh
vaqt-e-shumār zaḳhm mirā ḳhasta-tan bhī lā

sākit khaḌā thā vaqt magar tesha-zan havā
patthar kī tah se 'zeb' nikāle ga.ī mujhe

paḌ jaa.e laakh vaqt magar ye nahīñ qubūl
maiñ dekhtā rahūñ ki mire kaam aa.e kaun

'akbar' shāyad dil kho baiThe vo jalse vo ahbāb nahīñ
tanhā ḳhāmosh se phirte haiñ har vaqt udaas se rahte haiñ

Tālne se vaqt kyā Taltā rahā
āstīñ meñ saañp ik paltā rahā