Tags-Waqt

husūl-e-āgahī ke vaqt kaash itnī ḳhabar hotī
ki ye vo aag hai jis aag meñ zinda jalūñgā maiñ

shab hai is vaqt koī ghar na khulā pāoge
aao mai-ḳhāne kā darvāza khulā hai yaaro

vaqt sab se baḌā muhāsib hai
baat itnī mirī dhyān meñ rakh

ik parī-vash kī ināyat ne zamāne meñ mujhe
vaqt kā apne sulaimān banā rakkhā hai

ġhamoñ ne pyaar se jis vaqt haath phailā.e
to sab ko chhoḌ ke ham kis ḳhushī ke saath chale

mushkil vaqt meñ
agar kuchh log hamārī madad nahīñ kar rahe

gayā jo haath se vo vaqt phir nahīñ aatā
kahāñ umiid ki phir din phireñ hamāre ab

abas in shahriyoñ meñ vaqt apnā ham kiye zaa.e
kisī majnūñ kī sohbat baiTh dīvāne hue hote

kuchh bhūlī-bisrī yādoñ kā albelā shahr basāyā hai
koī vaqt mile to aa niklo yahīñ miltā huuñ yahīñ rahtā huuñ

kho chuke the vaqt kī pahchān bhī 'shahzād' ham
ajnabī lamhe magar ik āshnā tak le ga.e

ab bhalā chhoḌ ke ghar kyā karte
shaam ke vaqt safar kyā karte

koī aTkā huā hai pal shāyad
vaqt meñ paḌ gayā hai bal shāyad

mujhe kyā ḳhabar vaqt ke devtā kī hasīñ rath ke pahiyoñ tale pis chuke haiñ
muqaddar ke kitne khilaune zamānoñ ke hañgāme sadiyoñ ke sad-hā hayūle

maiñ hī us vaqt tujh se bachhḌā thā
jab tirī chāhatoñ meñ shiddat thī

vaqt ke dāman meñ koī
apnī ek kahānī rakh

vaqt munsif hai ḳhud sazā degā
ham agar shā.irī ke mujrim haiñ

us vaqt ek sajda baḌe kaam aa gayā
maiñ jab guzar rahā thā anā ke azaab se

vaqt ke saath saath us kā qad
aur kotāh ho gayā hogā

kuchh nahīñ is ke sivā aur tamannā merī!
vaqt ke saath har ik zaḳhm ko bhar jaane de

thartharātī rahe ab ḳhvāh hamā-vaqt zamīñ
so ga.e ḳhāk-e-abad oḌh ke sone vaale