Tags-Waqt

vaqt ke ghaaT utar kar nahīñ vāpas lauTe
daaġh malbūs-e-mah-o-mahr ke dhone vaale

jī chāhe use vaqt ke hāthoñ se uḌā le
jo ruuh kī ḳhāmosh guphāoñ meñ milā hai

kitne sapnoñ ke mukuT TuuT ga.e ik pal meñ
kitnī yādoñ ke tilak vaqt ke māthe se dhule

vaqt vo hai ki har ik qadr kā mafhūm nayā
aur be-gāna-e-hālāt tabī.at merī

aur to dil ko nahīñ hai koī taklīf 'adam'
haañ zarā nabz kisī vaqt Thahar jaatī hai

maiñ ne lamhoñ meñ guzārī haiñ hazāroñ sadiyāñ
vaqt kī dhuup meñ pighlā huā dariyā dekhā

kis vaqt 'kaif' TuuT ke gir jaa.e kyā ḳhabar
palkoñ pe ek halqa-e-zanjīr-e-yās hai

bār-hā dil tirī qurbat se dhaḌak uTThā hai
go abhī vaqt mohabbat meñ vo aayā bhī nahīñ

dil vo hai ki fariyād se labrez hai har vaqt
ham vo haiñ ki kuchh muñh se nikalne nahīñ dete

vaqt ġhamnāk savāloñ meñ na barbād kareñ
kuchh na kuchh sa.i-e-ilāj-e-dil-e-nāshād kareñ

zarā sā vaqt ke sūraj ne ruḳh jo badlā hai
mire vajūd pe kuchh saa.e muskurāte haiñ

narm chāhat kī phailī huī ghaas ko vaqt ke saḳht patthar na rauñdeñ kaheñ
bas yahī ḳhauf apnī nigāhoñ meñ thā muskurāne ko ham muskurāte rahe

abhī to maslahat-e-vaqt hī pe nāzāñ hai
abhī ḳhirad ko mayassar kahāñ maqām-e-junūñ

zehn-e-'shiblī' meñ hai us kī guuñj bhī
vaqt ke hoñToñ pe jo naġhma nahīñ

har vaqt mahviyat hai yahī sochtā huuñ maiñ
kyuuñ barq ne jalāyā mirā āshiyāñ na pūchh

tham ga.ī vaqt kī raftār tire kūche meñ
aise sābit huā sayyār tire kūche meñ

na paayā vaqt ai zāhid koī maiñ ne ibādat kā
shab-e-hijrāñ huī āḳhir to sub.h-e-intizār aa.ī

jo vaqt mehrbāñ huā to ḳhaar phuul ban ga.e
ḳhizāñ kī zard zard sī qabā hī aur ho ga.ī

tulū-e-sub.h kī kirneñ bahut hī ḳhuub haiñ lekin
jamāl-e-shahr-e-dil vaqt-e-sahar kuchh aur hotā hai

na jaane vaqt kī gardish dikhā.egī kyā ruḳh
guzar rahī hai jo ye zindagī ġhanīmat hai