Tags-Waqt

jaane kis vaqt ye uḌ kar mire dil tak pahuñche
manzileñ duur haiñ āzār-e-jaras sāmne hai

vaqt-e-āḳhir bhī hazrat-e-nāseh
apnā muñh qibla-rū na kar paa.e

gardish-e-vaqt se laḌnā hai jhagaḌnā hai abhī
chaḌhte sūraj haiñ hameñ aur ubharnā hai abhī

saf-e-salīb jahāñ intizār kartī thī
masīh-e-vaqt usī rahguzar se guzre haiñ

vaqt kī sāzish gahrī hotī jaatī hai
dīvāroñ ke rañg utarte jaate haiñ

is vaqt tak to vaz.a meñ aayā nahīñ hai farq
terā karam sharīk jo parvardigār thā

maiñ musavvir huuñ bure vaqt kī tasvīroñ kā
raas aate haiñ ye dīvār ke jaale mujh ko

maut har vaqt aanā chāhtī hai
koī hiila koī bahāna ho

ab to har vaqt vahī itnā rulātā hai mujhe
jis ko jaate hue maiñ dekh ke ro bhī na sakā

salīb-e-vaqt par maiñ ne pukārā thā mohabbat ko
mirī āvāz jis ne bhī sunī hogī hañsā hogā

naved-e-sar-ḳhushī jab aa.egī us vaqt tak shāyad
hameñ zahr-e-ġham-e-hastī gavārā ho chukā hogā

go hama-vaqt na.ī lagtī hai duniyā lekin
shai purānī ho to bosīda sī ho jaatī hai

vaqt kī uñglī pakḌe rahnā achchhā lagtā hai
ham ko chalte-phirte rahnā achchhā lagtā hai

sarhad-e-vaqt ke us paar tū jaane de mujhe
ai ġham-e-yār! vahāñ par bhī bulā leñge tujhe

kyā ḳhabar kaam kā lamha koī haath aa jaa.e
kāsa-e-vaqt kisī roz khañgāleñge tujhe

sub.h ke vaqt shaam ke hañgām
be-quyūd-e-maqām be-hañgām

mai-e-rañgīñ kā jaam uThāte vaqt
ranj-o-ġham kī hañsī uḌāte vaqt

qabl-az-vaqt phañsā daam meñ aur phañste hī
jo tamannā yahāñ laa.ī thī use yaad kiyā

badal ga.e haiñ taqāze mizāj-e-vaqt ke saath
na vo sharāb, na sāqī, na ab vo mai-ḳhāne

phir dil se 'fānī' saare ke saare naqsh-e-jafā miT jaate haiñ
jis vaqt vo zālim sāmne aa kar jān-e-hayā ho jaatā hai