Tags-Waqt

paḌī hai maar jab se vaqt kī Darne lagā huuñ maiñ
chaḌhā thā jo javānī kā nasha pal meñ utar aayā

kyā vaqt thā kyā vaqt hai is soch se hāsil
chhoḌo jo huā kyā use mīzān meñ rakhnā

bādshāh-e-vaqt koī aur koī majbūr kyuuñ
bin gayā hai ik zamāne kā yahī dastūr kyuuñ

buzurg kahte the ik vaqt aa.egā jis din
jahāñ pe Dūbegā sūraj vahīñ se niklegā

nashsha jis vaqt bhī TūTegā, ka.ī andeshe
sub.h-e-lab-basta ke siine meñ utar ā.eñge

tū ne ai vaqt palaT kar bhī kabhī dekhā hai
kaise haiñ sab tirī raftār ke maare hue log

jo ḳhanjar-ba-kaf qatl-gāhoñ meñ thā
vahī vaqt ke sarbarāhoñ meñ thā

hamīñ na hoñ kahīñ dekho to ġhaur se logo
haiñ tifl-e-vaqt ke hāthoñ meñ kuchh khilaune se

arbāb-e-vaqt jānte haiñ rozgār ne
kī sahv se vafā to talāfī zarūr kī

ab davā kaisī hai duā kā vaqt
tere bīmār meñ rahā kyā hai

kis qadar badla hai mujh ko vaqt ne hālāt ne
aa.ina hai sāmne lekin merā chehra nahīñ

mujhe rahm aatā hai aisoñ par basar apne karte haiñ vaqt jo
kisī phal se yā kisī phuul se kisī paat se kisī saag se

zindagī karte haiñ kis tarah ye sīkho is vaqt
'shād' kyā naf.a agar marne pe jiinā aayā

maut anjām hai māhaul hai ġhaflat kā yahāñ
vaqt har lamha shikārī kī tarah taak meñ hai

jis kā vajūd vaqt se pahle kī baat hai
vo bhī adam se barsar-e-paikār mujh meñ hai

muḳhtalif samt bahā.e liye jaatā hai hameñ
vaqt ke saath hamārā koī paimān nahīñ

nargis kī aañkh tujh par paḌtī hai be-tarah sī
mat vaqt-e-shām jaanā bahr-e-ḳhudā chaman meñ

ye habs-e-vaqt ye lā-intihā ghuTan kī ruteñ
baras ke khul bhī kabhī abr-e-ehtimāl-e-qadīm

'zafar' mire ḳhvāb vaqt-e-āḳhir bhī tāza-dam the
ye lag rahā thā ki maiñ javānī meñ jā rahā thā

vaqt se pahle bulā lete haiñ piirī ko uluum
umr se aage nikal jaate haiñ chehre bil-umūm