Tags-Waqt

vaqt-e-sahar hai uTTho kamar tum bhī bāñdh lo
sūraj nikal rahā hai na.ī raushnī ke saath

ḳhvāb ko sūrat-e-hālāt banā jaatā hai
dil ko aanā ho to be-vaqt bhī aa jaatā hai

ye umr-e-sust-gām guzartī hai is tarah
har aan dil ko vaqt-shumārī se kaam hai

jis vaqt us dayār se aġhyār-e-bul-havas
bad-ḳhūiyoñ se yaar ke ho kar ḳhafā ga.e

is vaqt vahāñ kaun dhuāñ dekhne jaa.e
aḳhbār meñ paḌh leñge kahāñ aag lagī thī

vaqt guzrā to judā.ī bhī judā.ī na rahī
ham yahāñ aur vo bhopal meñ ḳhush rahte haiñ

vaqt ke saath hī hālāt badal jaate haiñ
ye haqīqat hai magar mujh ko sunātā kyuuñ hai

azal abad to faqat havāle haiñ vaqt kī be-maqām gardish
ḳhabar nahīñ hai thame kahāñ par kahāñ se jaane chalī huī hai

mumkin hai ki rone kā kuchh vaqt mile
bārish kā imkān batāyā jaatā hai

vaqt kahāñ rukā bhalā par ye kise gumān thā
umr kī zad meñ aa.egā tujh sā parī-jamāl bhī

vo kahāñ vaqt ki moḌeñge inaañ aur taraf
dil kisī aur taraf hai to zabāñ aur taraf

sahar ke giit gā rahe haiñ aur vaqt-e-shām hai
nazar meñ māh-o-kahkashāñ haiñ azmat-e-bashar nahīñ

umr kā rasta aur koī hai vaqt ke manzar aur kahīñ
maiñ ne bhī donoñ ko baham bachpan se alag kar rakkhā hai

vaqt bhī pahchān se munkir rahā
dhund meñ lipTā rahā ye ā.īnā

dil thā us kā lekin ab ham mar ke deñge huur ko
vo pashemāñ hai ki vaqt-e-intiqāl aa hī gayā

sitam-zarīfī rahī vaqt kī jo dil TuuTā
kisī pe dosh lagāne se kuchh nahīñ hogā

umr-bhar jin kī vafāoñ pe bharosa kiije
vaqt paḌne pe vahī log badal jaate haiñ

aañkh lag jaa.e to vahshat kam ho
chāñd kis vaqt na jaane nikle

garm kar 'sājid' lahū ko dhīmī dhīmī aañch se
vaqt se pahle tire jazbāt meñ halchal na ho

zehn ḳhālī ho ga.e haiñ vaqt ke ehsās se
sāmne vo mas.ala rakh jis kā koī hal na ho