Tags-Waqt

rā.egāñ hone na do ai 'shauq' tum vaqt-e-azīz
ye vo shai hai jo nahīñ miltī hai kho jaane ke ba.ad

ḳhayāl-e-yār ke sadqe ḳhayāl-e-yār hī hogā
tasallī mujh ko dene koī vaqt-e-iztirāb aayā

muskurānā zer-e-lab har vaqt hī
koī sīkhe aap kī tasvīr se

vaqt-e-nuzūl-e-sher hai 'ḳhusrav'
sub.h ga.ī ab raat huī hai

gardish-e-vaqt kaT ga.ī āḳhir
lo gahan se nikal gayā sūraj

dil jalāo yā diye āñkhoñ ke darvāze par
vaqt se pahle to aate nahīñ aane vaale

vaqt har zaḳhm kā marham to nahīñ ban saktā
dard kuchh hote haiñ tā-umr rulāne vaale

vaqt badlā to uThāte haiñ ab uñglī mujh par
kal talak haq meñ mire haath uThāne vaale

koī ġharīboñ ke mārne se havā bañdhī hai kisī kī zālim
agar sulaimān-e-vaqt hai to qadam na rakh mor-e-nā-tavāñ par

kar baiThe haiñ chuur us ko ye bahte hue lamhe
dil vaqt ke hāthoñ meñ khilaunā thā hamārā

har-vaqt ārzū-e-azāb-e-jahīm hai
hāthoñ se hijr ke huuñ maiñ kyā kyā azaab meñ

usī ke jalve the lekin visāl-e-yār na thā
maiñ us ke vāste kis vaqt be-qarār na thā

ab to ruuTh jaane kā vaqt hī nahīñ miltā
tujh ko āzmāne kā vaqt hī nahīñ miltā

vaqt ke taqāze haiñ mere ḳhushk hoñToñ ko
giit gungunāne kā vaqt hī nahīñ miltā

yuuñ taras ga.iiñ āñkheñ ḳhud ko dekh lene ko
aa.ina dikhāne kā vaqt hī nahīñ miltā

aarzū kī jo duniyā kho ga.ī hai rāhoñ meñ
us ko DhūñD laane kā vaqt hī nahīñ miltā

kis tarah balā.eñ ab tujh ko diid kī ḳhātir
rāsta sajāne kā vaqt hī nahīñ miltā

so chuke haiñ jo armāñ yaas ke shabistāñ meñ
ab unheñ jagāne kā vaqt hī nahīñ miltā

un tumhārī yādoñ kī raushnī ġhanīmat hai
ab diye jalāne kā vaqt hī nahīñ miltā

dil meñ hai har vaqt ik mahfil jamī
kyā huā gar maiñ kabhī tanhā huā