Tags-Waqt

Tok ke us se baat karūñ to yuuñ vo kahe hai chitvan meñ
mujh ko na chheḌo dhyān ajī is vaqt mirā hai aur kahīñ

talvār liye vo nahīñ maqtal meñ khaḌe haiñ
is vaqt mire aage mirī maut khaḌī hai

fir.aun-e-vaqt koī bhī ho sar-kashī karo
yārān-e-shahr merī tarah zindagī karo

na sub.heñ na shāmeñ
hamāre andar bas ek hī vaqt aa Thahrā

tai shuda hai yahāñ anjām azal se sab kā
faisla vaqt ke juzdān meñ rakkhā gayā hai

adl fariyād se milā na kabhī
vaqt chīḳhā kiyā hamesha se

vaqt miTTī meñ milā detā hai shāhoñ ko bhī
hashr tak kaun bhalā taḳht-nashīñ rahtā hai

itnā vaqt maiñ detā huuñ us laḌkī ko
ab to mere yaar bhī bāteñ karte haiñ

ek din vaqt batā.egā junūñ kī azmat
yuuñ to ham log haiñ rusvā sar-e-bāzār bahut

tum vaqt pe kar jaate ho paimān farāmosh
ye bhuul nahīñ hotī mirī jaan farāmosh

unheñ dekhā to zāhid ne kahā īmān kī ye hai
ki ab insān ko sajda ravā hone kā vaqt aayā

roz sūraj Dūbtā ugtā huā
vaqt kī ik kiil par laTkā huā

mire hāthoñ pe sūkhe phuul kī kuchh pattiyāñ rakh kar
bichhaḌte vaqt us ne mujh ko siine se lagāyā thā

hudūd-e-vaqt ke darvāze muntazir haiñ 'nasīm'
ki tū ye fāsle kar ke ubuur dastak de

vaqt ke tasalsul meñ ham ba-rañg-e-sho.ala the
umr-e-yak-nafas meñ bhī raushnī the duniyā kī

vaqt be-vaqt jhalaktā hai mirī sūrat se
kaun chehra mirī tashkīl meñ aayā huā hai

us vaqt bhī hāthoñ ne qalam ko nahīñ chhoḌā
jab in pe zarūrī thā ki shamshīr uThāte

tujh tak bhī pahuñchne ke liye vaqt nahīñ thā
kab daulat-e-duniyā tire rah-gīr uThāte

zindagī ke har qadam meñ vaqt kī raftār hai
zindagī ko nāpnā kyā vaqt kyā raftār se

sab ek nazar pheñk ke baḌh jaate haiñ aage
maiñ vaqt ke show-case meñ chup-chāp khaḌā huuñ