Tags-Waqt

'āzim' terī barbādī meñ sab ne mil-jul kar kaam kiyā
kuchh khel lakīroñ kā bhī hai kuchh vaqt kī kār-guzārī bhī

mauj-e-ḳhushbū kī tarah haath na aane vaale
ham ne ik saath bahut vaqt bitāyā huā hai

pas-e-ġhubār vaqt yuuñ pukārtā hai kaun ye
ki hijr-o-ġham kā silsila batāo kyuuñ gavārā hai

na faisla tumhārā hai na faisla hamārā hai
ye vaqt ke qazzāq ne chhupā ke tiir maarā hai

vaqt-e-mushkil meñ bhī hoñToñ par hañsī achchhī lagī
mere ḳhāliq ko mirī ye bandagī achchhī lagī

ye jo charāġh havāoñ kī dhun pe raqsāñ hai
use batāo abhī vaqt hai sudhar jaa.e

'shumār' sāmne us ke bhī guftugū ke vaqt
jo rañg chehre pe aayā thā maiñ ne aane diyā

shaam kā vaqt thā aur naav thī sāhil ke qarīb
paañv chhūte hī kināre ne kahā bismillāh

jīte-jī kī anjuman hai jīte-jī kā soz-o-sāz
ho ga.iiñ jis vaqt band āñkheñ na phir duniyā na ham

soch kā aa.ina dhundlā ho to phir vaqt ke saath
chāñd chehroñ ke ḳhad-o-ḳhāl bigaḌ jaate haiñ

har kaam kā vaqt muqarrar hai har kaam ko vaqt pe honā hai
kis baat kī āḳhir jaldī hai kis baat kā phir ye ronā hai

dil-e-tabāh bhī hai ālam-e-ḳharāb bhī hai
nigāh-e-dost yahī vaqt-e-inqalāb bhī hai

Thahrī huī lagtī thī havā aur har ik shai
jaise ki badan vaqt kā be-jān thā kal shab

vaqt māsūm-o-jarī rūhoñ ke darpai hai 'fuzail'
zinda jab tak haiñ sar-e-dār samajhiye ham ko

mauj-e-nafas ke saath rahe rishta-e-ummīd
dhaḌkā sā varna rahtā hai har-vaqt jaan kā

dekhā jo ek shaḳhs ajab ān-bān kā
ik silsila sā rahtā hai har-vaqt dhyān kā

'hasīb'-soz jo rassī ke pul pe chalte the
paḌā vo vaqt ki saḌkoñ pe chalnā bhuul ga.e

shahr-e-īqān kā har katba gavāhī degā
vaqt kī piiTh pe ummīdoñ ke lashkar dauḌe

ek se hālāt aa.e haiñ nazar har daur meñ
ruk ga.e mere qadam yā vaqt ne gardish na kī

sukūt-e-vaqt muarriḳh hai likh liyā us ne
jo pattharoñ ne kahā be-ḳhatā jabīnoñ se