Tags-Waqt

harīf-e-vaqt huuñ sab se judā hai raah mirī
na qasr-e-shāh se nisbat na ḳhānqāh mirī

vaqt barbād kartī rahtī huuñ
roz fariyād kartī rahtī huuñ

jaane kaun churā letā thā merā vaqt
wall-clock pe jaalā ban kar aayā huuñ

yaad aatā hai shab-e-vasl kisī kā kahnā
ḳhair hai ḳhair se is vaqt irādā kyā hai

royā yūñhī jo hijr meñ shab bhar to kyā ajab
taare kī tarah vaqt-e-sahar Duub jā.ūñ maiñ

vaqt se aage nikalne kī tamannā hai mujhe
tez to paañv kī raftār nahīñ kar saktā

us vaqt rañg lā.egā afsāna-e-vafā
dil kā lahū jab aa.egā ashk-e-ravāñ ke saath

chausar kā lutf ye hai ki jis vaqt po paḌe
ham bar-chahār bole to bar-panj le chalā

ehsān jo ajal se kaam terā bigḌe
is vaqt na ho dil meñ jahāñ ke jhagḌe

sāmne shāh-e-vaqt ke 'aslam' kaun kahe ye baat
chor na the fankār the ham phir kaaT liye kyuuñ haat

ishq kī sūrat jo badle to ho āshiq bhī kuchh aur
ye jafā-o-jaur kā har vaqt ḳhvāhāñ ab bhī hai

ummīd TuuTī huī hai merī jo dil mirā thā vo mar chukā hai
jo zindagānī ko talḳh kar de vo vaqt mujh par guzar chukā hai

vaqt ulaT de na bisāt-e-hastī
chaal ham chalte haiñ har baar ġhalat

pahlū meñ ik na.ī sī ḳhalish pā rahā huuñ maiñ
is vaqt ġhāliban unheñ yaad aa rahā huuñ maiñ

shāyad is daur kā shiv-jī hī samajh kar 'jāved'
vaqt ne ziist kā sab zahr pilāyā hai mujhe

jaane palak jhapakne meñ kyā gul khilā.e vaqt
har dam nazar ba-sūrat-e-hālāt chāhiye

larzish bhī hai sat.h-e-falak par gardish karte sitāroñ kī
vaqt kā ik Thahrāo bhī hai is aurañg-ḳhayālī meñ

tasallī jhūTī na de dil meñ kyā hai ye kah de
ye ḳhvāb lamhe churā vaqt ke ḳhazāne se

koī ruke ki chale gir paḌe ki thak jaa.e
guzartā vaqt Thahartā nahīñ kisī ke liye

ye zindagī to bahut kam hai dostī ke liye
kahāñ se vaqt nikaltā hai dushmanī ke liye