Tags-Waqt

hālāñki maiñ har vaqt vahīñ huuñ vo jahāñ haiñ
vo sochte rahte haiñ maiñ kyā jaane kahāñ huuñ

baiTho jī kā bojh utāreñ donoñ vaqt yahīñ milte haiñ
duur duur se aane vaale raste kahīñ kahīñ milte haiñ

vaqt kī har āvāz 'zafar'
mere dil kī dhaḌkan hai

vāmānda-e-vaqt aañkh ko manzar na dikhā aur
zimme hai hamāre abhī ik ḳhvāb kī tashkīl

achchhī ammāñ vaqt kī Dibiyā jo khul jaa.e kahīñ
aur ye ghanTe aur minute saare nikal kar bhaag jaa.eñ

vaqt chehre par jab us ke likh gayā nākāmiyāñ
kaise vo dīvār par 'kalkal' sajā.e aa.ina

bisāt-e-vaqt kī chāleñ samajh sakeñ 'rūhī'
kam-az-kam itnā to chālāk honā paḌtā hai

ek samay tirā phuul sā nāzuk haath thā mere shānoñ par
ek ye vaqt ki maiñ tanhā aur dukh ke kāñToñ kā jañgal

maiñ tere fiil ko mārūñgī apne payāde se
bisāt-e-vaqt pe ḳhud apnī chaal rakhtī huuñ

hai taqāza vaqt kā kyā kījiye
dushmanoñ se dostī hai aaj kal

in pāniyoñ se koī salāmat nahīñ gayā
hai vaqt ab bhī kashtiyāñ le jaao moḌ ke

ahmiyat kā mujhe apnī bhī to andāza hai
tum ga.e vaqt kī mānind gañvā do mujh ko

paḌ gayā vaqt to sadiyoñ ke bharam TuuT ga.e
kaam kuchh shaam se niklā na sahar se niklā

Dūbte vaqt zard thā utnā
log samjhe ki mar gayā sūraj

ye tum be-vaqt kaise aaj aa nikle sabab kyā hai
bulāyā jab na aa.e ab ye aanā be-talab kyā hai

aaj kī raat jaag lo yaaro
vaqt phir hashr tak hai sone ko

hue āshiqāñ ruup laila na majnūñ
vale huī hamāre vaqat uu kahānī

tū ham ko uThā lījiyo us vaqt ilāhī
jis vaqt uThe pahlū se dildār hamārā

lagtā hai itnā vaqt mire Dūbne meñ kyuuñ
andāza mujh ko ḳhvāb kī gahrā.ī se huā

to bach rahegā yaqīnan ye sirf āñkhoñ meñ
bachāyā tum ne na paanī jo vaqt ke rahte