Tags-Waqt

vaqt-e-ruḳhsat kisī kī āñkhoñ meñ
chhāyā kaisā ġhubār thā kyā thā

kuchh log haiñ jo jhel rahe haiñ musībateñ
kuchh log haiñ jo vaqt se pahle badal ga.e

hāthoñ meñ apne vaqt kī talvār ko sambhāl
phir zaḳhm khā ke mujh ko sambhalte hue bhī dekh

na ho jo tarjumān-e-vaqt 'razmī'
bhalā kyā fā.eda us shā.irī se

TūTtī haiñ ravāyāt-e-mīnā-o-mai kyā kareñge evaz meñ maqāmāt ke
ahl-e-tadbīr abhī vaqt-e-tadbīr hai aa.eñ aur ehtimām-e-tasalsul kareñ

maiñ sochtā huuñ to bas ye ki ab tumhārī shakl
guzarte vaqt ke hāthoñ badal ga.ī hogī

kahīñ ronā na paḌe tujh ko zamāne ke saath
are o vaqt kī jhankār par gaane vaale

shorish-e-vaqt huī vaqt kī raftār meñ gum
din guzarte haiñ tire ḳhvāb ke āsār meñ gum

ham ko ma.alūm thā ye vaqt bhī aa jā.egā
haañ magar ye nahīñ sochā thā ki pachhtā.eñge

vaqt ke saath hai miTī kā safar sadiyoñ se
kis ko mālūm kahāñ ke haiñ kidhar ke ham haiñ

zabān-e-vaqt kal se ik nayā afsāna chheḌegī
bahut thoḌī sī 'yāqūb' aaj kī rūdād baaqī hai

sahar ne aa ke chehra vaqt kā dhoyā to kyā dhoyā
fazāoñ par ġhubār-e-ḳhātir-e-nāshād baaqī hai

apne ġham-ḳhvār ke ashkoñ ko takā kartā huuñ
gardish-e-vaqt ne palkoñ pe sajāyā hai mujhe

har kaḌe vaqt pe ā.īna dikhāyā hai mujhe
zindagī tū ne baḌe pyaar se bartā hai mujhe

guzarne ko to mujh par bhī ajab ik hādisa guzrā
magar us vaqt jab sadmoñ kā aadī ho chukā thā maiñ

saañs rukne lagī hai siine meñ
ye kaḌā vaqt Taal de koī

kaun dikhā.e mujhe shaam se kitnī hasīñ
kaun batā.e mujhe vaqt kī qīmat hai kyā

nayā libās pahanñe kā vaqt hai 'sājid'
shikoh oḌh ke dekh ān-bān oḌh ke dekh

mushkil vaqt meñ aksar log badal jaate haiñ
chalte chalte apnī raah nikal jaate haiñ

raat ke vaqt jeb meñ jugnū
sub.h-tā-shām haath meñ titlī